SANTIAGO, Ilocos Sur. Taga-Lingsat, Santa Maria, Ilocos Sur manen dagiti natiliw nga agal-ala iti ikkan iti illegal a wagas iti kabaybayan a sakupen iti barangay Ambucao, iti daytoy nga ili.
Dagiti natiliw ket mapapati a da Jefie Daproza, Shery Boy Daproza ken Gideon Daproza, agpapada a residente iti Lingsat, Santa Maria, Ilocos Sur.
Ti panakatiliw kadagiti suspek ket gapu iti tawag ni kapitan Ruben Agosto, ket insigida a nagresponde da PSI Cirilo Butigan ket dita a natiliw dagiti tallo a mangngalap iti akto a panag-compressor.
Nakumpiskar manipud kadakuada ti 3 a pidaso ti waterproof flashlight, 1 a signal light, 1 a bilog, 2 a gaggles, 1 compressor tanks ken 2 a pana.
Nupay kasta, dagiti suspek ket napalubosan met laeng kalpasan a nagbayadda iti multada.
Maipalagip nga uray kadagiti napalpalabas nga aldaw, adda dagiti mangngalap nga illegal nga agkalap babaen iti compressor ket kadduan kadagitoy ket naggapu iti Lingsat, Santa Maria.
