Candon City. Kamaudiannanna, naan-anay met laeng a nabigbig ti kinabannuar ni Don Isabelo Abaya idi naipanagan kenkuana ti maysa a kalsada ditoy siudad ti Candon.
Naaprobaran ti ordinansa tapno mabaliwan ti nagan ti Abaya Street tapno agbalin daytoy a Don Isabelo Abaya Street a masarakan ditoy sentro ti siudad.
Daytoy ket babaen iti panangilungalong da bise Mayor Nestor Itchon, konsehal Julio Acance ken Rosario Villalobos iti ordinansa nga addaan bilang 08-043.
Iti maysa a privilege speech ni konsehal Acance, dinakamatna a ti kasasaad ni Don Belong a kas maysa a bannuar ket nabigbigen saan laengen ditoy Candon City no di ket uray pay iti nasional idi daytoy ket pinadayawan ti National Commission on Culture and Arts babaen iti panakairaman ti Candon iti pito a sites iti simultaneous flag raising ceremony idi Hunio 12, 2008.
Ni Don Belong ti nangideklarar iti panakawaya-waya ti Candon kadagiti nangsakup a Kastila idi Marso 27, 1898 babaen iti panagalsa a naawagan iti Ikkis Ti Candon.
Maipalagip nga awan pay ti naipanagan a kalsada wenno pasdek kenni Don Belong nupay daytoy ket mabigbigbig a Greatest Hero ti Candon.
