CANDON CITY. Maysa a pulis-Candon ken maysa a traffic aide ti nakangeg iti saan a napintas a balikas manipud iti maysa a lalaki idi tiliwenda ti maysa a traysikel drayber nga awanan lisensia ditoy siudad ti Candon.
Dagiti biktima ket da SPO2 Daniel Costales, PNP-Member ti Candon ken ti traffic aid ket ni Mark Anthony Fernandez, ditoy siudad ti Candon. Ti masuspetsa ket managan met iti Bobot Dy, residente iti barangay Paypayad, Candon City, Ilocos Sur.
Kas maibasar iti blotter ti pulisia, ni SPO2 Costales ti madama ti implementasionna iti traffic rules and regulations iti sanguanan iti Bank Of Commerce iti barangay San Isidro, idi tiniliwna ti maysa managan Greg iti Paypayad, ta awanan daytoy iti lisensia nga agpaspasada ti traysikel ditoy Candon City.
Gapu itoy, iniyabanna ti traffic aide tapno ikkanna iti ticket citation ngem ti nasao a traysikel drayber ti immadayo ket mapapati a tinawaganna ti bossna. Inala ngarud ti traffic aide ti franchise plate ti lugan, ngem kalpasan ti sumagmamano a minutos, simmungad ni Bobot Dy ket puersado nga inalana ti franchise plate nga addaan numero 2265 manipud iti traffic aide.
Mapapati a nangilaaw pay iti saan a balikas ti masuspetsa ket imbagana a ti inaramidda ket maysa a panagtakaw.
Pimmanaw ti masuspetsa nga iggemnan ti franchise plate. Agtultuloy met ti imbestigasion ti pulisia iti nasao nga insidente.
