CANDON CITY. “Kamatennakayo ti atiddog nga ima ti linteg!”
Daytoy ti kinuna ni PCI Marlo Castillo, agdama a chief of police ti Candon PNP kadagiti drug pusher ken personalities nga agdakdakiwas ditoy siudad ti Candon.
Daytoy ket kalpasan iti balligi manen a panagsukisok nga insayangkatda iti pagtaengan ti maysa a mapapati a drug pusher a nakaalaanda iti naisupot-supot a mapapati a marijuana.
Ti suspek ket managan Rodrigo ‘Goro’ Gandol, addaan iti naan-anay nga edad, residente iti barangay San Isidro, Candon City.
Iti panagsukisok nga insayangkat ti PNP-Candon ken PDEA, naala iti pagtaenganna ti 25 a plastic sachet a naglaon iti napagango a maatap a marijuana agraman ti 18 nga awan nagyanna a plastic sachet.
Inlawlawag ni Castillo a daytoy ket kas pasaruno iti insaysayangkatdan a panagsukisok kadagiti drug personalities ditoy Candon City.
“Adda warningko idin kadakuada, ket nag-lie lowda met iti sumagmamano a bulan, ngem na-monitormi a nagaktiboda manen iti daytoy a gundaway gapuna a nangisayangkatkami manen iti panag-raid.” Kinunana.
Addan iti kuerpo iti pulisia ti suspek, agraman dagiti naala a droga.
danny antalan
