SALCEDO, Ilocos Sur. Natiliw dagiti panakabagi ti linteg ti daytoy nga ili ti gandat a panakailibas koma kadagiti illegal a naputed a kayo iti daytoy nga ili.
Natiliw dagiti panakabagi ti linteg ti maysa nga Isuzu Elf truck, addaan plaka RDX-985, minaneho ni Dominador Cortez, residente iti Calangcoasan, Salcedo, Ilocos Sur.
Dagiti kayo ket mapapati a ginatang da Joseph Ellazar residente iti Padaoil, Santa Cruz, Ilocos Sur ken ni Ruel Galano, residente iti San Tiburcio, Salcedo, Ilocos Sur.
Agarup iti 104 a pidaso ti naragadi a kayo ti gmelina ti nakumpiskar nga addaan daytoy iti naduma-duma a rukodna. Natiliw daytoy idi awan maiparangda a naan-anay a permiso ken dokumentos iti panakabiahena.
Naala iti kuerpo iti pulisia dagiti kayo ngem nakasagana a maiturn-over daytoy iti Department of Environment and Natural Resources bayat a maisagsagana metten ti kaso a maipila kadagiti maseknan.
