GUMIL I.SUR,PINADAYAWAN NA DAGITI AMMA ITI GUNGLO

Vigan City- Pito a founding members ti GUMIL Ilocos Sur ti napadayawan iti maika-44 nga anibersario ti gunglo idi Oktubre 4. Naangay daytoy iti University of Northern Philippines babaen iti panangsangaili ni UNP Pres. Lauro B. Tacbas.

Kangrunaan a napadayawan ni retirado a dekano Gregorio Amano a maysa kadagiti nangpataud iti pagalagadan linteg ti GIS idi 1964.

Karaman pay a nabigbig da Carmencita Teodique-Aquino, Mercedes Tabbada-Llanes, Wilfredo Rabaja, Manolito rebibis, Rufo Tinaza ken Herminigildo Viloria.

Iti panagsarita ni Dr. Amano, dinawatna ti panagkaykaysa dagiti kameng ken panangbigbigda iti GUMIL kas lehitimo a grupo dagiti mannurat nga Ilokano a saan ket a masayya-sayya.

“Pagtalinaedentayo ti dignidad ti gunglo ken saan tayo a kalkalen ti basol ti tumunggal maysa,” kinuna ni Amano.

Karaman pay kadagiti immatendar da D. Godofredo reyes, Dr. Dedicacion Agatep-Reyes, DZTP Manager Arlon Serdenia, 2008 Palanca Awardee Danilo Antalan, Miss GIS Mee gateley ken dadduma pay. (Mancieltio S. Tacadena/NBN4-Vigan)