SANTA CRUZ, Ilocos Sur. Dua ti natay ken agarup 50 a mangngalap ti mapapati a nasabidongan ti sodium idi dagitoy ket nagkalap ti ipon iti kabaybayan iti barangay Pilar, iti daytoy nga ili.
Dagiti natay ket pakairamanan kada Ronald Jacinto, 28 anios ken Loreto Cabradilla, 48 anios, agpada a residente iti barangay Pilar kabayatanna a dagiti dadduma ket na-confine iti ospital ken ti dadduma ket nagpa-check iti health center.
Dagiti napakaruan ket pakairamanan kada Patrick Pascua, Arnel Pascua, Joel Rundariz, Rocky Manzano, Erwin Cabuenas, Edgar Cabradilla, David Manzano, Willy Manzano, Edwin Cabradilla, Glenn Ragandap, Carlo Cabuenas, Ruben Cabradilla, Ari Cabradilla, Edgar Cabradilla, Ambong Cabradilla, Arnold Randaris.
Dagiti dadduma a mangngalap ket boluntariada a nagpa-check iti health centers ken ospital.
Kabayatanna iti interview kenni Kapitan Prudencio Cabato, kinunana a dagiti mangngalap iti barangayda ket nagala ti ipon idi Setiembre 21 iti kabaybayan iti Pilar Santa Cruz.
Gapu iti kaadu ti maala ket adu kadagiti ti napan nagbatok nupay nalibeg ti danum ta kalkalpas ti bagyo.
Ngem kalpasan iti sumagmamano nga aldaw, dagiti mangngalap a nagala ti ipon ti nakarikna iti panakaulaw, panagkakapsut, agtultuloy a panagling-et, panagsarwa ken dadduma pay.
Mapapati nga adda ti naikabil a sodium iti kabaybayan iti dayta a gundaway nga isu ti gapu ti panakasabidong dagiti mangngalap. Ngem daytoy ket madama a nainget pay laeng a maim-imbestigaran.
Ti sodium ti mapapati a mangpaasideg ken mangpaummong kadagiti ipon iti disso a nakaikabilanna.
Kinuna ni Edwin Cabradilla, 36 anios, maysa kadagiti nagkalap, a nakarikna laengen isuna ti panagulaw ken agtultuloy a panagling-et agingga a nagtultuloy a nagkakapsut gapuna a nagpaitaray isunan iti ospital.
Kinunana a manipud alas siete iti bigat agingga alas singko iti malem, nagbatok isuna iti panagala iti ipon.
Agtultuloy ti nainget nga imbestigasion dagiti maseknan nga ahensia ti gobierno iti daytoy a napasamak iti dayta a barangay.
