leave credits naisingasing a mamonetized

Vigan City – Singasing a pannakaimonetized ti leave credits dagiti amin nga empleado ken opisyales, nainget a napagdedebatyan iti session ti konseho ditoy. Iti panangidatag ni Konsehal Everin Molina, daytoy ket mandatory para kadagiti empleyado. Segun kenkuana nasayaat kan daytoy ken dakkel a pakalag-anan ta adda insigida a pangnamnamaan ken pagtarayan dagiti empleyado no kas bilang emergency nga agkasapulan ti pinansyal dagiti pamilya da kumpara no umutang da pay laeng iti mainteresan.
Kinontra met ni Konsehal Loreto Quibilan kas chairman iti Committee on Finance and Appropriation nga ti leave credits ket nasaysayaat no maawat da apaman iti panagretiro.
Nupay kasta inproponir ni Molina a ti maavail iti kada empleyado ket gatad a sweldo iti makabulan ngem suhestyon met ni Quibilan maikkan laeng koma ti maximum a 10 nga aldaw ti mabalin da nga awaten agsipud ta agdepdepende da met laeng ti kabaelan ti pondo iti syudad.
Nasayaat met unay no mamonetized no la ketdi adda pondo, innayon met ni Konsehal Benjo Verzosa.
Immanamong ngarud ni Molina, iti singasing a 10 laeng nga aldaw ti mabalin a maimonetized ngem agdependen to met laeng iti desisyon ti Local Chief Executive no mano ti kadagupan a pondo a mailatang.
Gapuen ta kalikagum ti kaadduan iti pannakaidatag ti figure a maala manipud iti HRMO ken Budget Office daytoy ngarud ti naitantan a naaprobaran . (Nemia Icari)