CANDON CITY, ILOCOS SUR – Akto a natiliwan dagiti agpatpatrolya a pannakabagi ti linteg dagiti tallo a lallaki nga agsusugal, iti parkingan ti trisikel nga agturong iti brgy. Bagani Ubbog iti daytoy a siyudad, kangrunaanna iti amianan a paset ti pasdek nga daan a pagsenyan iti brgy. San Juan, aggarup oras alas onse singkuwenta idi aldaw kalman.
Dagiti suspek ket nagsalungasingda iti PD 1602 wenno illegal a sugal ket isuda Isagani Gabuyo y Galien, 31-anyos, naasawaan, tricycle driver ken residente iti brgy. Butol, Santiago, Ilocos Sur; Isagani Valdez y Gamez, 38-anyos, naasawaan ken Felipe Flores, jr. y Galutan, 32-anyos, baro, tricycle drivers ken agpada nga agnaedda iti brgy. Bagani Ubbog iti daytoy a siyudad.
Naarestar dagiti suspek bayat nga agpatpatrolya dagiti pannakabagi ti linteg a nakaluganda ti patrol car nga inmatunan ni DCOP PI Manuel Viaje, bayat a naggapuda iti brgy. San Antonio nga agturong iti daya. Naammuan a napasungadan dagiti suspek ti patrol car ngem saanda nga inkankano ket intuloyda ti nagsusugal.
Inmandar ni DCOP PI Viaje ti pannakaarestar dagiti tallo, karaman metten ti pannakakumpiskar ti kuwarta nga aggatad ti 171.00 pisos ken ti playing cards nga inusarda.
Dagitoy tallo ket naimbitaranda iti police station para ti naan-anay a pannaka-imbestigarda.
Jeff Barredo
