CANDON CITY, ILOCOS SUR – Itudtudo ti maysa kadagiti kahera ti Novo General Merchandized a masarakan iti brgy. San Antonio iti daytoy a siyudad, tallo nga aglanglanga a turista a ti pagsasaoda ket ingles a dagitoy ti mapapati a nagtakaw idi aggarup oras alas otso idi rabii.
Ti imbestigasyon dagiti pannakabagi ti linteg, aggarup oras alas 7:10 ti rabii idi simmangbay dagiti tallo a mapapati a costumer da a dagitoy ket dua a lallaki nga aglanglangada a turista ken maysa a babai nga agtawen ti nagbaetan 50 agingana 60 nga agpapada dagitoy nga ingles ti panagsaritada.
Naammuan a ti maysa a lalaki ket kinapatpatangna ti security guard, diay maysa ket as-asisteran ti sales lady, idinto diay baket ket adda idiay counter a mapapati nga ipakpakitana ti kuwartana a dollar iti kahera a ni Rowena Puruganan.
Kalpasan iti dayta a gundaway, dagiti tallo ket pimmanawda iti nasao nga establishimento, idinto ti kahera ket binilangna ti kuwarta nga adda iti counter box, nasdaaw laengen ta diay naglakkuanda nga 11,000.00 pisos ket mapukpukaw.
Kinuna ni Puruganan, nadlawna nga inyasideg ti costumerda a baket iti imana iti asideg iti counter. Ket iti dayta a gundaway, inpakaammona iti security guard a tapno kamakamenda dagiti tallo a naudi a costumerda ngem nabayagen a nakapanawda.
Jeff Barredo
