CANDON CITY, ILOCOS SUR – Negatibo ti resulta iti naisayangkat a drug test manipud iti Regional Crime Laboratory Office -1, dagiti dua pulo ket maysa a lallaki manipud ti insayangkat a panag-raid ti PDEA idi aggarup oras alas dies idi rabii ti domingo iti maysa a pagtaengan sadiay brgy. Paypayad iti daytoy a siyudad.
Rimmuar ti resulta ti drug test dagiti dua pulo ket maysa a lallaki a residenteda iti daytoy a barangay aggarup oras alas 2:40 idi malem kalman, sigida met a napalubusan manipud ti pannakakustudyada iti polisya dagitoy babaen ti panangawat kadakuada ni Brgy. Capt. Ruz Valdez iti daytoy a lugar.
Maipalagip nga aggarup oras alas dies idi rabii ti domingo dagiti kameng ti PDEA nga inmatonan ni Benzon Abacco ket naki-coordinateda iti police station iti daytoy a siyudad para ti panangisayangkatda ti raid iti pagtaengan ni Marcelino Cortez iti daytoy a lugar gapu ti impormasyon manipud iti civilian agent nga adda ti grupo nga agisayangkat ti pot session bayat ti panagisayangkatda ti initiation rites.
Ti operasyon ket nagresulta ti pannakakumpiskarda dua a heated sealed plastic teabags; maysa a kaha ti posporo a naglaon ti bulong ti marijuana a nasarakanda iti rabaw ti lamesaan, ken ti grupo ti lallaki ti bilang a dua pulo ket maysa a dagitoy ti inimbitaranda iti police station para ti pannaka-drug test da.
Jeffbarredo
