SAN ESTEBAN, Ilocos Sur. Uppat nga agaama a mangngalap ti mapukpukaw iti kabaybayan ti Tsina idi dagitoy ket napan nagkalap idi Nobiembre 27, 2008 iti barangay Apatot, iti daytoy nga ili.
Iti interview kenni Kagawad Reynaldo Oandasan iti Apatot, kinunana a dagiti biktima ket da Florendo Mostoles, Sr., Florendo Jr., 22 anios; Louie, 26; ken ni Jojo, 18 anios, agpapada a tubo ti Dili, Santa Cruz, Ilocos Sur ngem naeden iti Apatot.
Kinuna ni Kagawad Oandasan a parbangon idi Huebes idi nagrubbuat dagitoy a nagpataaw, nagluganda iti dua a bilog ti kagawad.
“Siguro, sir, gapu iti napigsa ti angina, napattog ti bilogda wenno diay maysa sa da nagkakalubbon iti maysa a bilog.”
Patienda a dagitoy ket naipadpad iti daga, ngem kabutengda a panunoten nga amanganto ketdi a nalmesdan iti taaw.
Kinuna ni Danny Boy Mostoles, inunaan kadagiti agkakabsat a naitagtagainepna da tatang ken kakabsatna: “adda iti nasayaat a kakabsat ti dua kadakuada ngem nakapsut unayen ti dua ket agpatpatulongda payen.” Kinunana.
Kabayatanna, nagpanawagan met ni Desiree, nga asawa ni Louie tapno iti kasta ket ipakaammoda nga insigida no adda ti masarakanda a mangngalap.
Maipalagip nga itay nabiit ket adda ti dua a mangalap a naitawtaw iti taaw gapu met laeng iti nadawel a paniempo ngem nakalasatda kenni patay idi adda ti nangilugan kadakuada a shipping vessel.
