PANTALAN, MASIMPA

SAN ESTEBAN, Ilocos Sur. Mapapintas ken masimpa ti pantalan babaen iti panakapaatiddog iti breakwaterna a daytoy ket babaen iti panangpondo ti Department of Transportation and Communication wenno DOTC.
Daytoy ti naammuan kenni Mayor Chester Elaydo ti bayat iti interview kenkuana ti DZTP ken Tawid News Magasin.
“Maikkan iti extension ti breakwater tapno umat-atiddog.” Kinuna ti mayor bayat iti interview.
Kinunana pay a daytoy ket karaman payen iti programa iti turismo ti ili ta ditoy ngamin ti maysa a destinasion dagiti bakasionista.
“Daytoy ket kas maysa a programami kenni Congressman Singson iti turismo babaen iti panangsimpa iti Villa Quirino port.” Innayonna.
Inlawlawag a daytoy ket naaddaan iti pondo babaen iti DOTC iti sumurok-kumurang P6.8 a million a pesos.
Kinunana a daytoy panakasimpa iti breakwater ket pakpakauna pay laeng, ket maisarunonto ti riprapping wenno seawall iti barangay San Pablo.