Vigan City. Nauram ti Administration building wenno Elpidio Quirino Hall ti University of Northern Philippines iti barangay Tamag, itoy a siudad.
Iti impormasion a naala ti DZTP iti City Fire Station ti Candon, agarup ala una iti parbangon idi mauram ti nasao a building nga insigida met a nagrespondianda.
Ti administration building ket isu ti ayan dagiti records dagiti estudiante ken dagiti empleado ti maysa a pagadalan gapuna nga adda dagiti madanagan no nairaman ti recordsda.
Ti admin building ti UNP ket maysa a daan a pasdek ken daytoy ket naaramid ti pasetna kadagiti kayo gapuna a daras a nauram daytoy.
Pakairamanan kadagiti nagresponde ket ti fire station ti Vigan City, JTC, Vigan Red Drying, Magsingal, Santa Catalina, Santa, Cabugao, Narvacan, Caoayan, Santa Maria, ken Candon City.
Maipalagip nga idi Hulio 2008, ti College of Arts and Sciences ti UNP ket nauram met laeng.
Kitkitaen dagiti otoridad ti short circuit a gapuna ti uram. Di pay masisinuo no mano ti gatad ti nadapo.
