San Esteban, Ilocos Sur- Sigida a natay ti driver ti motorsiklo ken grabe a nasugatan ti kinasakayna gapu ti panangdungparda ti maysa a minibus a sarsarunuenda, napasamak aggarup oras alas dose y media idi aldaw kalman iti national highway a masaksakupan iti brgy. Quirino, San Esteban, Ilocos Sur.
Dagiti biktima ket nabigbig ti nagan Reynante Espanto y Guerson, 19-anyos, baro ken residente iti brgy. Cappa-cappa iti daytoy nga ili nga isuna ti nagmaneho ti maysa a single motorcycle a Ramas Sr 100, addaan plaka 9122-AO ken ti kinasakayna ket mabigbig laeng ti nagan a Dante.
Idinto ti minibus a karaman ti nasao nga insidente ket maysa a KMB Tourister, agmaris ti puraw ken nalabbaga ken addaan plaka AYK 123 a minaneho ni Ricson Supnet y Cera, 35-anyos, naasawaan, addaan lisensia ken residente iti brgy. Lanipao, Narvacan, Ilocos Sur.
Ti imbestigasyon kadagiti kameng ti polisya iti daytoy nga ili, ti mini-bus ket agdaldalyasat iti kawatiwatan ti national highway a masaksakupan iti nasao a barangay.
Naammuan a nagdispasyo gapu ta adda dagiti tao iti igid ti kalsada tapno pidutenna dagitoy, nga isu metten ti aksidente a panangdungpar ti motorsiklo a nagluganan dagiti biktima a mangip-ipus ti nasao a minibus.
Nagresulta a ti driver ti motorsikslo ket nagsagaba ti pannakasugsugat iti nadumaduma a paset iti bagina karaman metten ti kinasakayna.
Sigida nga intaray dagiti kameng ti polisya a nagresponde dagiti biktima iti nasao a pasamak nga inpanda iti ospital sadiay Reyes Clinic and Hospital iti ili ti Santa Maria, Ilocos Sur.
Ti driver ti motorsiklo ket indeklara dagiti doktor a natay daytoy idinto ti kadduana a managan laeng ti Dante ket inyakarda sadiay St. James Hospital iti siyudad ti Vigan para ti naan-anay a pannakatamingna.
Jeff Barredo
