CANDON CITY. Maysa a misis ti nagpulong iti pulisia gapu iti panangbekkel kenkuana ti asawana idiay barangay San Agustin itoy a siudad.
Ti biktima ket managan Cherry Ramos, 24 anios, OFW, residente Bagani Campo, Candon City kabayatanna a ti mapapati a suspek ket managan Marlon Jay Ramos, 24 anios, residente iti San Agustin, Candon City.
Iti pulong ti misis iti pulisia, nagturong isuna iti balay ti suspek tapno bisitaen ti anakna ngem ditan metten a binekkel ken kinabil isuna ti asawana.
Kinunana pay a nagsinada agsipud ta ti lalaki ti mapapati a nangmolestia iti kabsatna a babai.
Naaddaan iti garungyad iti tengnged ken mata ti biktima.
Inlawlawagna pay a mabutbuteng daytoy agispud ta kinuna kano ti suspek nga agpakamatay daytoy ket isurotna ti anakda.
