Galimuyod, Ilocos Sur- Agpapan iti daytoy a gundaway, blangko pay laeng ti imbestigasyon kadagiti kameng iti polisya iti daytoy nga ili mainaig ti pammaltog a napasamak idi aggarup oras alas 9:30 idi rabii ti sabado sadiay brgy. Nagsingcaoan a nakatayan ti maysa a mangngilot.
Ti biktima ket nabigbig ti nagan Arsenio Buagayan y Astrero, 48-anyos, naasawaan, mannalon, mangngilot ken residente iti nasao a barangay.
Ti imbestigasyon kadagiti kameng ti polisya, ti biktima ket mapapati nga agid-idda idi iti papag iti uneg iti balayna idi simrek ti saan a nailasinan a suspek a lalaki nga awan ti masinuo a rason ket ditoy a pinaltopaltoganna.
Nupay kasta, kalpasan ti nasao nga insidente nakataray pay laeng ti sumagmamano a metros a rimmuar manipud iti pagtaenganna kalpasanna nadalupo nga isu ti nangpaltogan manen ti suspek a nangkamat kenkuana.
Nagsagaba ti tallo a tama ti paltog ti biktima iti bagi ken ulo daytoy.
Naammuan a sigida a naitaray ti biktima sadiay City of Candon Hospital manipud kadagiti kaarrubana nga immarayat, ngem indeklara kadagiti doktor a naka-duty a natay ti biktima.
Ti paltog a naaramat ket malysa a kalibre 45, basar kadagiti tallo a kapsula ken maysa a buli ti kalibre 45 a narekobre iti nakapasamakan ti nasao a pammaltog.
Jeff Barredo
