Burgos, Ilocos Sur- Sigida a natay ti nagmaneho ti motorsiklo, idinto nakaro met a nasugsugatan ti kinasakayna gapu ti aksidente a panangdungparda iti alad ti rangtay iti Burgos Bridge, Brgy. Ambugat, Burgos, Ilocos Sur a napasamak idi aggarup oras alas dies idi naminsan a rabii.
TI natay a biktima ketk nabigbig nga isu ni Ronnel Enriqauez y Manuel, 23-anyos, manalon a daytoy ti nagmaneho ti maysa a single motorcycle a Rhamski, agmaris ti nangisit ken addaan plaka DD-3182, idinto a nakaro met a nasugsugatan ti mismo a kabsatna a kinasakayna a nabigbig a ni Ruben Enriquez y Manuel, 44-anyos, naasawaan, mannalon ken residenteda iti brgy. Dayanki, BUrgos, Ilocos Sur.
Ti imbestigasyon kadagiti kameng dagiti pannakabagi ti linteg, dagiti agkabsat ket panpanurnurenda idi iti kalsada a naggapuda iti brgy. Luna nga agturongda iti Brgy. Poblacion Norte iti daytoy nga ili.
Naammuan idin ta masungaddan iti rangtay, aksidente a naidungparda iti nagsakayanda a motorsiklo iti landok nga alad ti nasao a rangtay.
Nagresulta ti pannakasugsugat dagiti dua a biktima, ken naitarayda sadiay Reyes Clinic and Hospital iti ili ti Sta. Maria, Ilocos Sur babaen kadagiti concern citizen a timmulong kadakuada.
Indeklara kadagiti mangngagas iti nasao nga ospital a natay ni Ronnel idinto ni RUben ket agdama pay laeng nga agpalpalaing kadagiti sinagabana a sugat.
Jeff Barredo
