Agregreggaay A Kalsada, Maibirbirokan ti Pondo

No agbibiaheka, no makagtengen iti paset iti Santa, Ilocos Sur, adda paset ditoy nga agsikko nga agpadaya wenno ag-detour agsipud ta daytoy paset ti national highway ket matibtibbag, kinapudnona ket agpapan kadagitoy ket dandani natibbag ti paseten daytoy nga highway.
Ngem impasingked ni Engr. Ray Elaydo, District Engineer ti 2nd engineering district ti probinsia ti Ilocos Sur nga addan pondona daytoy para iti panakasimpana.
“Daydiay ket igid ti baybay… nabayagen daytoy a nabagyo isu a dimmawat ni Congressman Eric Singson ti pondona.” Kinunana.
Inlawlawagna nga idi narba daytoyen, addan ti instruksion ni Congressman Singson para iti program of workna tapno daytoy ket maisubmitar.
“Agpapan ita ket awan pay… ngem adda ti nakapila nga imbagada nga adda umay a pondona. Yur-uraymi dayta.” Kinuna pay ni Elaydo.
“Daydiay detour road ti i-maintainmi pay laeng ta pangur-urayanmi iti daydiay a pondo ti Santa seawall.”
Agarup iti P50 a milion ti inprogramada a kasapulan a pondo iti daytoy a proyekto ket yur-urayda ti initial releasena kano P25 a milion para iti daytoy a proyekto.
Maipalagip a daytoy ti national highway nga adda iti igid ti baybay ti kanayon a marebba nangruna no tiempo ti napigsa ti tudo nupay daytoy ti masimsimpa met ngem madadael to manen.