Candon City. Adda manen napasamak nga aksidente iti Darapidap beach road, partikular iti asideg iti Candon Wet Market barangay San Agustin itoy a siudad.
Dagiti lugan ket Honda XRM 125, addaan plaka 5529-AN, minaneho ni Dsil Vernebryan Sorio, 24 anios, iti Guardia, Banayoyo ken ti Black Euro, addaan plaka 7745-AL, minaneho ni Ronie Manzano, residente met iti Talogtog, Candon City.
Naglugan iti XRM da Danny Pang-ao, 20 anios iti Matibuey, San Emilio ken ni Dennis Dumag, 24 anios, residente iti Nagtablaan, Santa Lucia, kabayatanna a naglugan met iti Euro ni Marycel de Guzman, 23 anios iti Talogtog, Candon City.
Iti inisial nga imbestigasion, ti XRM ket agpadaya ket mapapati nga agaangaw dagiti tallo a naglugan kabayatanna a ti Euro ket agpalaud met idi napasamak ti aksidente.
Kinuna ti drayber ti Euro nga inala ti XRM ti liniada kabayatanna a kinuna met ti naglugan iti XRM nga ag-overtake ti Euro.
Ginandat ti XRM ti pumanaw iti nakapasamak ti aksidente ngem nalapdan daytoy babaen iti traysikel kabayatanna a mapapati a nakainom iti arak ti drayber ti XRM.
Nasugatan ni Marycel iti dayta nga aksidente ket naitaray daytoy iti ospital para iti panakaagas kenkuana.
dannyboy
