Kidkidawen ti panakangiwat ti soldado iti human rights groups iti panakaimbestigar iti panakapapatay iti maysa a rebel returnee a napapatay itay nabiit.
Iti programada nga Oras Ti Soldado iti DZTP Radio Tirad Pass, kidkidawenda iti human rights groups kas koma iti Karapatan-Ilocos tapno iti kasta ket imbestigaranda ti panakapapatay kenni Johnny Habon iti Salcedo, Ilocos Sur.
Iti programa, kinuna ni Sgt. Marcelo Garcia, civil military affairs officer ken mangibagbagi iti 5oth Infantry Battalion iti programada iti radio, a kitaenda koma met daytoy a napasamak.
Kinunada a ti biktima ket mapapati a pinatay dagiti kameng ti New Peoples Army wenno NPA ket rumbeng laeng a maikkan daytoy iti hustisia.
Ti biktima a ni Johnny Habon ket napapatay idi Hunio 1, bayat iti kaaddana iti pagtaenganda idiay barangay Kinmarin, Salcedo, Ilocos Sur.
Ni Johnny Habon ket mapapati a kimmapon iti NPA idi 2003 ngem kalpasan iti makatawen ket nagsubli daytoy iti sidong ti gobierno.
