SANTA MARIA, Ilocos Sur. Sinarungkaran ken dinaniwan dagiti opisial ken kameng ti GUMIL-Ilocos Sur ni Dr. Godofredo Reyes iti panakaisayangkat ti necrology para kenkuana.
Indauluan ni Dr. Edilberto H. Angco, presidente ti GUMIL-Ilocos Sur, ti gunglo idi Hulio 11, 2009 tapno padayawan ti Laureado a Mannaniw ti Ilocandia.
Ni Dra. Dedicasion Reyes ti nangpasangbay iti gunglo ken nakisarsarita pay daytoy kalpasan ti programa.
Paset iti nagbalin a programa ket ti panakaibasa iti daniw a nairuknoy kenni Apo Godo ken ti panakaipaay kadagiti sumagmamano a pakalaglagipan nga artikulo.
Pakairamanan kadagiti nagatendar ket da Herminigildo Viloria ken ti singin a Tabbada sisters a makuna a punganay a kameng ti Gumil Ilocos Sur, da Generato Pastores, Stephen Balanza, Dr. Jaime Raras ken ti pamilia, Danny Antalan, Djuna Alcantara ken dadduma pay.
Ni Dr. Reyes ket maysa kadagiti nangsapuyot iti irarang-ay iti GUMIL wenno gunglo dagiti mannurat nga Ilocano, ket iti kinamannaniwna ken kinamannurat, adu ti naitulongna iti irarang-ay iti literatura-Ilocana.
Iti disso a nakamasayaganna ket ditoy a naisayangkat iti adu a gundaway ti konbension ti GUMIL-Filipinas, ken isuna pay ti nangidonar iti lote a nakaipatakderan iti di pay nalpas a Balay Ti Gumil.
Natay ni Apo Godo idi Hunio 5, 2009.
