Lalaki, napaltogan, natay

Burgos, Ilocos Sur-Nainget ti isaysayangkat a ‘follow-up investigation’ kadagiti kameng ti polisya iti daytoy nga ili mainaig ti napasamak a pammaltog a nakatayan ti maysa a lalalki idi parbangon kalman, aggarup oras ala una, sadiay brgy. Callitong, Burgos, Ilocos Sur.
Nabigbig a ti biktima managan Elmer Dizon y Pimentel, 45-anyos, mannalon, naasawaan ken residente iti nakapasamakan ti nasao nga insidente, manipud kadagiti di nailasinan a suspek.
Ti imbestigasyon kadagiti pannakabagi ti linteg, naammuan nga aggarup ala una idi parbangon ti martes, ti biktima a kadduana ti live-in partner na a managan Rosemarie Dagdag y Lazaro, nataengan ket matmaturogda iti uneg ti pagtaenganda a masarakan iti turod a lauden a paset ti nasao a barangay.
Naammuan a dagiti di nailasinan a suspek, ket nagkatokda iti ridaw ti pagtaengan iti biktima.
Naammuan pay nga idi napan linukatan ti biktima ti ridaw, sigida a pinaltopaltogan dagiti suspek ti biktima a nakapuntaan iti nadumaduma a paset iti bagina a nangitunda ti sigida a nakatayanna.
Kabayatanna dagiti saan a nailasinan a suspek ket sigida met a naglibasda kalpasan ti insidente.
Nakarekobre dagiti kameng ti polisya iti nakapasamakan ti pammaltog ti uppat a kapsula ti M16 rifle ken maysa a cartridge para iti carbine.
Agdama pay laeng nga am-ammuen dagiti kameng ti pannakabagi ti integ no ania ti motibo ti nasao a pammaltog.
Jeff Barredo