SAN EMILIO, Ilocos Sur. Gapu iti aktibo a tignay ti bumarangay, rural health unit, DOH ken dagiti opisial ti ili, napengdan ti ad-adda a panagraira ti sakit a dengue itoy nga ili.
Kinapudnona, saanen a nanayonan pay ti kaso ti dengue kadagiti napalabas nga aldaw.
Daytoy ti naammuan bayat iti panakiuman-uman kenni Dr. Sherly Luna, agdama a rural health unit doctor itoy nga ili bayat iti innuman kenkuana.
Dinakamatna a kadagiti napalabas a bulan manipud idi rimsua ti sakit gapu iti kagat ti lamok idi bulan ti Mayo, nangruna iti barangay Tiagan ken Lancuas, saanen a nanayunan pay ti bilangda.
Maipalagip a dua ti natay ken nakurang limapulo ti naapektaran ti daytoy a sakit itoy nga ili kadagiti napalabas nga aldaw.
Nagkaykaysa dagiti opisial ken taga-RHU, agraman dagiti bumarangay ken dadduma pay a sector iti panangipakbo kadagiti posible a pagitlogan ti lamok. Nangisayangkatda pay iti fogging operation, ken kangrunaan ti amin ket ti information dissemination nangruna iti panagdaldalus iti lugarda.
Kas resulta, napengdan ti ikakaro kadagiti biktima iti daytoy nga ili.
