CANDON CITY. Natay ti maysa a baro a naglugan iti motorsiklo idi naaksidente a nakidinungpar daytoy iti Partas Bus, iti barangay Paras, Candon City.
Ti biktima ket managan Daryll Greig Hadap, 20 anios, residente iti Sabuanan, Santa Lucia, Ilocos Sur kabayatanna a ti Partas ket addaan plaka AVZ-632, minaneho ni Diomedes Christy Corpuz, 39 anios, residente iti Camaan, Burgos, Ilocos Norte.
Iti inisial nga imbestigasion, ti XRM nga addaan plaka BI-4128 a minaneho ti biktima ket agpaabagatan kabayatanna nga agpa-amianan met ti Partas. Nagsinapgidda iti tengnga iti kalsada babaen iti panakasagid iti kanigid a bakrang ti bus.
Kinuna ti drayber ti bus a ginandatna a liklikan ti panag-face to faceda babaen iti panagpadaya koma ngem gapu ta adda ti nakaparking a trailer truck gapuna a dina unay naipaigid.
Dead on arrival ti biktima idi naitaray iti ospital kabayatanna a naaddaan iti nakaro a panakadadael dagiti lugan.
