Nasurok iti 2000 a senior citizen ti nakipartisipar iti panangrambak iti Elderly Filipino Week Celebration iti Candon City itay nabiit.
Daytoy ket babaen iti programa a naisayangkat iti Candon Civic Center a kas paset iti panagragragsakda ken panakipagmaymaysa iti panangkita iti aldaw para kadagiti babbaket ken lallakay.
“Nangisagana kami iti programa kas koma iti panagsala, panagkanta, panakapili ti Mr. and Mrs. Senior Citizen ken dadduma para iti panagragragsakmi.” Kinuna ni Mr. Elpido Gabatin bayat iti interview kenkuana. Isuna ti presidete ti Candon City Federation of Senior Citizens Association ti Candon.
Addaan iti tema, Nakakatanda: Dangal ng Bayan, Noon at Ngayon—nagbalin a naisangsangayan nga aldaw kadakuada ti simple a programa.
Kas resulta ngarud, nagbalin a naragsak dagiti babbaket ken lallakay babaen iti panagsalada ken panagkanta kas panangipasimudaag a kabaelanda pay laeng ti mangipaay iti ragsak ken mangipadanon ti importansia kadagiti umili.
