Banayoyo, Ilocos Sur. Umadanin ti Todos Los Santos, ket madama kadagitoy a pakaburiboran dagiti umili ket ti panakasimpa iti panteon dagiti minatayda.
Iti ili ti Banayoyo, maysa kadagiti proyekto nga insayangkat ti local government ket ti panakadalus ken libre a panakapintura kadagiti amin a panteon iti lima a sementerio.
Naammuan daytoy bayat iti panakiuman-uman kenni Sangguniang Bayan Member Santos Bayaya.
Dagiti lima a sementerio itoy nga ili ket masarakan iti Poblacion, Pila, Elefante, Banbannaal ken barangay Lopez.
Malaksid iti libre a panakapintura iti amin a panteon, maikkan pay dagitoy iti silaw intono Oktubre 30, 31, Nobiembre 1 ken 2.
“Adu latta ngamin dagiti mapmapan mangsarungkarda iti minatayda iti rabii.” Kinuna ni Sangguniang Bayaya.
Inkalikagumda laeng a makipartisipar koma dagiti umili iti daytoy a programa ni mayor Severino Galanga babaen iti panangdalusdan kadagiti panteon ti minatayda tapno naparpartak ti panakapintura kadagiti panteon.
Maipalagip a kannawidanen ni Ilocano a sarungkaran dagiti minatayna no madanon ti Todos Los Santos. Nupay kasta, gapu ta kapades ti panagapit ti pagay, adu pay laeng kadagitoy ti mangitantan tapno mauna ti panaggapas.
