Maysa kadagiti aktibo nga organisasion a mangisaysayangkat ti panangtulong nangruna kadagiti napakaruan dagiti napalabas a bagyo ket ti Lions Club-Candon City.
Naammuan kenni Jane Fontanilla, ti Lions Club-Candon City a nangisayangkatda manen iti medical mission ken relief operation idiay Tuguegarao, Cagayan idi Oktubre 30, 2009.
Daytoy ket babaen iti panangidaulo ni Lions Governor Modesto Pacquing tapno matulongan dagiti napakaruan ti bagyo Pepeng ken Ramil.
“Agarup iti 300 a pamilia ti inikkanmi iti relief goods ken naikkan iti medical check-up ken agas.” Kinuna ni Ms. Fontanilla iti interview kenkuana.
Agtultuloy daytoy a programada a kas paset iti panangipaay iti tulong tapno makabangon dagiti biktima ti bagyo.
Kadagiti napalpalabas nga aktibidadda ket ti panangisayangkatda iti First Sight Mission ditoy Candon City ket nangisaysayangkatda ti konsultasion ti mata ken panangited iti libre a reading eyeglasses.
Idi Agosto 2009, agarup iti 1,640 ti naikkan ti reading glasses iti panakaisayangkatna idiay Candon City plaza.
