Candon City. Nakangeg iti saan a napintas a balikas dagiti kameng ti pulisia ti daytoy nga ili bayat iti panag-imbestigarda iti maysa nga insidente a naidanon iti pulisia.
Daytoy ket gapu iti mapapati a panangibalikas ti maysa managan Glaiza Garnace iti dakes a sao kadagiti imbestigador iti dayta a gundaway.
Kas maibasar iti blotter, ni City Guard Elpidio Batin, Jr. iti barangay Caterman ti nangkuyog kenni Justine Leando Herman, iti San Isidro, Candon idi daytoy ket mapapati a kinabkabil ti sabali a grupo dagiti lalaki idiay San Jose. Daytoy ket kalpasan met a ti grupo ni Justine ti nangkabil met iti maysa managan Allan Gonzalo.
Bayat iti konprontasion it pulisia, maysa managan Merel Garnace, iti San Isidro ti nangkuna “Bro, intayon, awan rason tay dita pulis,” sa rimmuar daytoy.
Ti duty investigator ti nangsaruno ken nangdamag no ania ti naganna, ngem dita metten a lumabas ti managan Glaiza ti nagkuna “—nayo, min, gapu ta pulis kayon!”
Idi damagen ti imbestigador ti naganna, imbes nga agsardeng, nagtultuloy ketdi ti panagsaona kadagiti dakes a balikas.
Mapapati a ti suspek ket nakainom iti arak.
