Immaboten iti pito gasut ti kaso ti dengue iti Ilocos Sur idinto nga addan sangapulo ket tallo a natay gapu itoy a sakit. Maibasar daytoy iti datus nga imparuar ti Provincial Health Team Office-Ilocos Sur nga addaan iti petsa a Setiembre 20. Kaaduan a kaso ti nailista iti ili ti Cabugao nga addaan I ti 81 a kaso ken 2 a natay; sinaruno daytoy ti Sta. Maria nga addaan iti 73 a kaso ken 3 a natay; addaan met iti 68 a kaso ti Candon City nupay awan ti natay kadagitoy; 50 met a kaso ti nailista iti ili ti Suyo a maysa kadagitoy ti natay ken maikalima ti Narvacan nga addaan iti 47 a kaso. Awan met ti nailista a kaso ti dengue kadagiti ili ti Alilem, Sugpon ken Gregorio del Pilar.
Idi Setiembre 21, nagsasango dagiti mangimaton iti salun-at iti probinsia tapno mapagpapatangan dagiti adding nga aramidenda tapno maprebentaran ti panagadu dagiti agbalin a biktima ti nasao a sakit. Karaman kadagiti dimmar-ay iti taripnong dagiti representante ti Provincial Health Team Office, DepEd, DILG, Red Cross-Ilocos Sur, Provincial Social Welfare and Development Office, SPM Jerry Singson , Chairman ti Committee on Health and Sanitation ken Dr. Gerardo Lahoz, consultant ti provincial government iti benneg ti salun-at.
Iti eksklusibo a pannakiuman ti Around Ilocandia Channel ken ni Dr. Lahoz, kinunana a napagnunumuanda ti pannakaisayangkat ti Dengue Summit tapno maaddaan iti napagmaymaysa nga addang ti amin a sektor kontra iti sakit. Maangay daytoy inton Setiembre 30 iti kapitolio.
“Babaen ti panagsasango ti amin, maikabassittayo ti kaso ti dengue gapu ta saan laengen nga iti tiempo ti panagtudtudo a parikut ti sakit no di pay ket iti sibubukelen a tawen. No adda koordinasion, nadardaras met a maisapulan iti kasapulan a dara dagiti biktima” imbinsa-binsa ni Dr. Lahoz.
Naipasa metten iti hunta probinsial ti resolution a pinutar ni Vice Governor Deogracias Victor “DV” Savellano a pannakaisayangkat iti dengue Summit iti tinawen. (Mancielito S. Tacadena)
