Saan koma nga agpatingga dagiti inna a mangsapul iti naimas ngem nasalun-at (nutritious) a potahe tapno saan laeng a napnek ti pangraman (tastebuds) no di pay ket agtalinaed ti kinasalun-at ti pamilia. Daytoy ti kinuna ni Vice Gov. Deogracias Victor “DV” Savellano bayat ti Provincial Nutrition Culmination Activities iti kapitolio.
“Masapul ti inobasion iti sidaen ken pangmerienda nga idasar iti lamisaan tapnomakatulong iti pannakaiyestablisar ti nasalun-at a komunidad” kinuna ti bise gobernador.
Itoy a gundaway a napili kas Most Outstanding Barangay Nutrition Scholar iti Ilocos Sur ni Perla Tubalina ti Nalasin, Sto. Domingo Kadua ni Tubalina a napadayawan da Macrina Saturno ti Bonifacio, Cabugao; Maricel Mendoza ti Cadacad, Burgos; Aurora Lagmay ti Poblacion Sur, Santiago ken Charito Berciles ti Suysuyan, Lidlidda a nagpili para iti maikadua agingga iti maikalima a puesto kas panagsaganadda.
Napadayawan met ti ili a Cabugao kas Green Banner Awardee ita a tawen kalpasan a nailistada ti kabassitan nga insidente ti malnutrision iti sibubukel a probinsia. Nagpuesto met iti maikadua agingga iti maikalima dagiti ili a Burgos, Sto. Domingo, Lidlidda ken Cervantes.
Iti cooking contest, nangabak ti Galimuyod, sinaruno ti Santiago ken San Vicente. Inyawid met ni Analiza Laoad (San Emilio) ti umuna a puesto ti nutria quiz para kadagiti inna idinto a maikadua ni Alona Ebol (Galimuyod) ken maikatlo ni Zenie Abrencillo (Bantay).
Bayat ti maysa nga aldaw nga okasion, inikkan ni Vice Governor Savellano iti premio a P3,000 ni Zenie Abrencillo, maysa nga ina nga agtawen iti 24 ken taga Cabusligan, Bantay kalpasan a naamuan ti bise gobernador a nakaimula daytoy iti 29 a pinuon iti marunggay iti arubayanda. Sipud pay iti 2001, inwarwaragawagen ni Savellano ti nainsaknapan a panagmula iti marunggay kadagiti arubayan. Paborito ti bise gobernador ti marunggay gapu ta nasustansia daytoy a nateng.
Iti BArang-ay Demofarm iti san juan, mapapaadu ti seedlings ti marunggay a maiwaras kadagiti barbarangay iti probinsia. (Mancielito S. Tacadena)
