Umabot iti 2.5 milyon ti pategna a ganagan ti naipaay kadagiti mannalon iti Cabugao idi Nobiemre 8. Naggapu iti R.A. 7171 municipal share ti pondo a naigatang kadagiti ganagan.
Lima a ribu a mannalon ti nawarasan iti sagsaysa a sako ti ammonium phosphate kabayatan ti simple a seremonia a naangay iti Cabugao Culture and Sports Complex a dinar-ayan da Governor Luis “Chavit” Singson ken Vice Governor DV Savellano.
Iti maysa nga interview ken ni Mayor Edgardo “Ediboi” cobangbang Jr. kinunana a daytoy ti umuna a programana babaen ti ID system nga inaramidna para kadagiti mannalon.
“Immuna, pinaidentifyko dagiti lehitimo a mannalon iti tunggal barangay babaen ti Municipal Agriculture Office ken iti pannakitinnulong dagiti farmer leaders tapno malapdan ti pananggundaway dagiti manglimlimo a mannalon” kinuna ni Cobangbang.
Ita tunggal proyekto a maited para kadagiti mannalon ti ID laengen ti ipakitada tapno makaavailda tapno naan-annayas ken dagiti talaga a mannalon ti mabenepisiaran.
Naggapu kadagiti mannalon dagitoy a pondo isu a rumbeng laeng a maipaay met laeng daytoy para iti pagsayaatanda.
Impadamag pay ti ama ti ili a naaprobaran metten iti konseho municipal ti 7.1 milyon a pondo a maipaay kadagiti mannalon ti tabako itoy a panagtatabako. Agpaayto daytoy a pondo a maiwaras a pagpuonan dagiti mannalon tapno masigurado ti nangato a kalidad ti binulong dagiti mulada a tabako.
Kabayatanna, kinuna ni Gov. Singson a napintas a pagtuladan dagiti dadduma nga ti inaramid ti LGU ti Cabugao.
“Daytoy ti kapintasan a proyekto para kadagiti mannalon tai toy a proyekto mariknada nga isuda ti prioridad” kinuna ti gobernador.
Sinaludaran pay ni Vice Gov. DV Savellano daytoy nga addang ti lokal a gobierno ti Cabugao ta kaaduan nga umili ti mabenepisiaran.
“Daytoy ti mangipakita nga adda maymaysa a direksion ti LGU ken ti probinsia no maipanngep iti proyekto ti pagpapatangan” innayon ni Savellano. (Mancielito S. Tacadena)
