Inyawat ti Department of Agriculture Regional Field Office I iti panangidaulo ni Atty. Cipriano Santiago, Regional Executive Director ti proyekto ti ahensia a Barangay Bagsakan iti Brgy. Puro, Magsingal idi Nobiembre 4.
Inyawat ni Santiago ti P50,000 kas puonan, maysa a weighing scale ken 20 a plastic crates iti Rural Improvement Club (RIC) ti nadakamat a barangay nga isu ti mangtarawidwid iti nadakamat a proyekto.
Iti eksklusibo nga interview ti Around ilocandia Channel ken ni Santiago, dinawatna kadagiti mangimaton a saanda koma a tumutok iti no ania laeng a dagiti produkto nga adda iti barangay no di ket isuda koma ti mangidanon kadagiti inaldaw-aldaw a kasapulan dagiti agindeg babaen ti panagangkatda met iti sabali a barangay wenno iti sentro.
“Ti gagem ti proyekto ket ti pannakapaadda iti food security iti barangay isu a masapul a dakayon ti manggatang iti produkto dagiti bumarangay kas iti natnateng manipud iti talon ken lames manipud iti baybay tapno dakayo ti mapan mangilako iti sentro. Iti panagawidyo gatangenyo metten dagiti masapul dagiti kabarangayanyo a masarakan iti sentro tapno dakayon ti gumatanganda” indagadag ni Santiago.
Ti barangay bagsakan iti Puro ti maikatlon a naiyestablisar ti Departamento ti Agrikultura. Immuna ditoy ti naipatakder iti Sabang ken Salomague, Cabugao.
Pinagyamanan met ni Marife tabisula, Presidente ti RIC ti gundaway a naipaay iti asosasionda tapno mangimaton iti naipaay a proyekto iti barangay. Inkarina a sayaatenda ti panangmaneharda iti bagsakan ta makatulong daytoy iti tunggal pamilia iti Puro.
Iti maysa a teleconference, kinauman met ni Gov. Luis “Chavit” Singson dagiti opisial ti barangay iti panangidaulo ni Brgy. Capt. Angelito Torricer. Nupay adda ti gobernador iti Bicol tapno agatendar iti miting dagiti gobernador, inkarina ti personal nga ibibisitana iti Puro tapno pagsasaritaanda ti dawat ti kapitan a pannakabangon ti permanente a pasdek para iti bagsakan. Innayon pay ti gobernador a mangipasdek ti gobierno probinsial iti mini ice plant ken block freezer iti lugar tapno pumaut ti kinapresko dagiti makalapanda a lames.
Ipadpadas itan ti gobernador ti possible a pannakaiyestablisar ti teleconference iti tunggal programa iti naduma-duma a paset ti Ilocos Sur tapno makaumanna dagiti lumugar ken makitana ti situationda uray adda isuna iti ruar ti probinsia a makipatpatang kadagiti padana a gobernador ken investors a mayat nga agpuonan iti Ilocos Sur. (Mancielito S. Tacadena)
