Candon City.  Dua a lalaki a nakatraysikel iti sidecar number 0112 ti nangbutbuteng iti uppat a lalaki iti San Isidro, Candon City.

Ti umuna nga insidente ket iti CDO delivery truck a naglugananda Raymund Padre, residente iti Naguilian, Caoayan, Ilocos Sur, ni RJ Alviar iti Pagburnayan Vigan ken ni Anthony Ragon iti Bulag, Bantay, Ilocos Sur.

Dagiti dua a suspek a di nagbigbig ket nakalugan iti motorsiklo a nagluganan iti traysikel body number 0112.

Iti pulong dagiti biktima, nakaparkingda iti San Isidro, Candon City idi adda dagiti suspek a nangpanabtuob iti luganda.  Maigapu iti dayta ket immalisda iti wet market ngem dita a simmurot dagiti suspek ket nang-assualt kadakuada babaen iti panangiggem iti malo, ngem inanawa ida dagiti traysikel drivers.

Kabayatanna, iti reklamo met ni Joefrey Dacio, 26 aniuos iti Mabayag, Galimuyod, Ilocos Sur. nasapgid isuna traysikel nga addaan body number 0112.

Kinunana a nagimet iti malo ken kutsilio ti suspek.

Idi agangay, naammuan a ti drayber ti traysikel ket managan Joseph Pablico iti San Jose, Candon City.

Saan metten nga interesado nga agipila ti kaso dagiti maseknan.

CANDON CITY.  Agarup iti P20,000 kas financial assistance ti awaten ti maysa ti maysa a tanod a matay ditoy siudad ti Candon.

Daytoy ti naammuan kenni Engr. Naulie Cabanting, CPDO officer ditoy Candon City bayat iti interview kenkuana.

Kinunana a siasinoman a kameng ti barangay Tanod iti barbarangay a pumusay ket adda itulong ti city government iti pamilia.

Direkta nga aggapu iti pondo ti city government ti assistance agsipud ta daytoy ket nailatang.

“Adda iti insurance idi ti paggapuan ti assistance kadagiti Tanod, ngem napiliiwmi a ti ibaybayad a P100,000 nga insurance iti tinawen ket saan a maaramat amin agsipud ta dua wenno tallo laeng ti matmatay iti tinawen.” Kinuna ni Cabanting.

Gapu iti daytoy, imbes a maidalan iti insurance, direkta laengen ti panakaited ti financial asistance.

Inlawlawag ni Cabanting no kas pangarigan ad-adu ngem lima ti matay, mabalin latta met a manayonan daytoy babaen iti maysa nga ordinansa.

dannyboy

Candon City. Nagpiansa para iti temporario a panakawaya-wayana ti lalaki a na-raid gapu iti paltog iti barangay langlangca 2nd, Candon City.

Ni Richard Billedo, 36 anios, iti nadakamat a barangay ti nagpiansa. Babaen ngarud iti pammilin ni RTC branch 71 judge Policarpio Martinez, daytoy ti temporario a mawaya-wayaan pay laeng iti pagbaludan.

Maipalagip a ni Richard ti na-raid ket naala nakumpiskar dagiti sumaganad a banag: 2 a paltog, naduma-duma a bala, magazines, holster ken magazine pouches.

Ti suspek ket naipilaan iti kaso iti panaglabsing iti RA 8294

Candon City.  Gapu iti panagsiripna iti labing-labing ti maysa a mistro, naireklamo daytoy iti pulisia ken naipilaan iti kaso iti piskalia.

Ti suspek ket managan Paquito Aglibot, residente iti Caterman Candon City, kabayatanna a ti nagreklamo ket nailinged iti nagan a Jims, maysa a high school public teacher.

Iti pulongna iti pulisia, bayat iti labing-labingda kenni baketna iti kuartoda idi adda nangegna iti ruar.  Kinitana ti tawa ket nasiputanna ti maysa a lalaki a kumkumleb iti dayta a gundaway.

Linuktanna ti silaw ket nangala iti danum sana sinibugan daytoy, ngem kaskasdi a saan a timmakder ti lalaki.  Idi nangala ti plastic a danum ti biktima ket bansagenna koma ti suspek, ditan a timmakder daytoy.

“Manong, siak.”  Kinuna pay ti suspek.  Nakigtot ti biktima agsipud ta kasinsinna met gayam ti mapapati nga agsisirip.

Naireklamo daytoy ket maipila ti kaso nga unjust vexation gapu iti panagsirip ti suspek.

Candon City.  Gapu iti utang, kinabil ti maysa a lalaki ti kabsatna a babai iti barangay Darapidap itoy a siudad.

Ti biktima ket managan Vilma Gacutan, 35 anios, naasawaan, residente iti nasao met laeng a barangay kabayatanna a ti suspek ket managan met iti Pastor Gacutan, Jr. kabsatna.

Kas maibasar iti blotter ti pulisia, nagturong ti lalaki iti balay ti biktima ket bayat iti panagsangoda, induronna daytoy ken mapapati a tinapisna pay daytoy.

Mapapati a ti rason ket ti utangda iti tunggal maysa.

Candon City.  Nasugatan ti ulo ti asawa ti maysa a kagawad ti barangay babaen iti kaanakanna iti barangay Langlangka 2nd itoy a siudad.

Ti biktima ket managan Ronaldo Gacutan, addaan legal nga edad, kabayatanna a ti mapapati a suspek ket managan Albert Gamat, 23 anios, agpada a residente iti nadakamat a barangay.

Kas maibasar iti blotter ti pulisia, kinuna ni Kagawad Divina Gacutan, a nagturong ti asawana iti pagtaengan ni Aquilino Gamat tapno kapatang ti ipagna.  Ngem idi simmangpet ni Albert, dita metten a mapapati kinabilna daytoy ket nasugatan ti ulona.

Immun-una ngem daytoy, nagpa-blotter met ni Albert ket kinunana a simrek iti balayda ni Ronaldo ket dita a nangibalikas iti saan a napintas a sao ket imbagana pay nga agawid daytoyen agsipud ta nakainom.  Ngem ketdi, mapapati a kinamat ni Ronaldo ni Albert babaen iti kumpay, induron daytoy ni Albert ket ditan a natuwang daytoy a nakaitim-ogan ti ulona.

Gapu iti dayta, nasugatan ti ulo ti biktima.

Agtultuloy ti imbestigasion dagiti panakabagi ti linteg.

dannyboy

Candon City.  Natakawan iti sumurok-kumurang P30,000 ti TSPI-Candon a masarakan iti barangay Ayudante, Candon City.

Idi sumrek iti trabahona iti dayta a bigat ni Herminio Hernaez, residente iti San Jose, Candon City, accountant ti nasao nga establisemento ket dita a nakitana a nakangato iti apagkatlon ti pull-up doorna.

Natakkuatan a nakastrek dagitoy babaen iti panangdadael iti lock agraman ti lock iti mainfront ket dita nga inwara-warada dgiti adda iti opisina.

Agarup iti P30,000 ti natakaw.

danny

Candon City.  Nakabkabil ti maysa a barito bayat iti panagpallailangna iti Candon City Plaza idi nasarakan dagiti uppat a lalaki a dumawdawat iti kuarta.

Ti biktima ket managan Gabriel Dantes, 16 anios, high school student, residente iti Candon City.  Kabayatanna a dagiti suspek ket mapapati a da Jonathan Aldrin, ken maysa nabigbig managan Atong, residente iti San Agustin, Candon City.  Ti dua ket saan a nabigbig.

Iti inisial nga imbestigasion dagiti panakabagi ti linteg, ti biktima ket agbisbisikleta iti agarup alas dies iti rabii idi inasitgan ti uppat a lalaki ket dumawdawatda iti kuarta.

Idi imbaga ti biktima nga awan kuartana, ditan a mapapati a kinabilda isuna. Naaddaan iti sugat iti rupana, partikular iti bibigna.  Kabayatanna a naglibas dagiti suspek kalpasan ti insidente.

danny

CANDON CITY. Maysa a Honda Wave ti mapapati a nakarnap kabayatan a daytoy ket nakaparking iti paraangan iti nangsalda iti lugan iti barangay Bagani Ubbog, Candon City.

Nagreport iti pulisia ni Gee Macaraeg, addaan iti naan-anay nga edad, residente iti nadakamat a barangay gapu ta dayty Honda Wave a maris pink, addaan plaka 4318-CL, sinaldana iti P15,000 kenni Perla Mae Salacan, iti Balidbid, Salcedo, Ilocos Sur.

Kinunana nga adda ti nangngegda a taul ti aso iti dayta a gundaway ngem inyaleng-alengda laeng, ngem idi kitaemda ti motorsiklo kalpasan iti sumagmamano a gundaway, awan metten daytoy.

Agtultuloy ti imbestigasion dagiti panakabagi ti lineg.

CANDON CITY.  Gapu iti idadaliasat ti maysa a parsua, naidungpar iti maysa nga alad ti kotse bayat iti panagdaliasatna iti Darapidap road, Candon City.

Naidungpar ti kotse a Honda Sedan, addaan plaka UHH-850, minaneho ni Runel Nartatez, 32 anios, residente iti Santa Lucia, Narvacan, Ilocos Sur ti alad a banbantayan ni Romeo Gonzalez iti barangay Darapidap, Candon City.

Iti imbestigasion ti pulisia, ti lugan ket agturturong iti daya ket idi nakabatog daytoy iti Talogtog junction, adda ti limmabas a nakabiglaanna agingga a naidungpar iti alad ti balay.

Nupay nakaro a nadadael ti ti lugan ken alad, awan met naan-ano kadagiti tao.  Inkari met ti drayber a sungbatanna ti nadadael iti alad.