Candon City.  Maysa manen a babai ti biktima ti grupo a budol-budol gang ditoy siudad ti Candon.

Ti biktima ket managan Yolanda Gabumpa, 32 anios, residente iti Calaoan, Candon City, kabayatanna a dagiti suspek ket saan a nabigbig.

Iti inisial nga imbestigasion dagiti panakabagi ti linteg, ti biktima ket nagturong iti Cebuana Lhuillier tapno alaen ti inpatulod ni lakayna nga adda idiay Manila.

Ngem bayat iti panagturongna iti paradaan ti para Calaoan, dita nga inasitgan isuna ti dua a lalaki a kunwari ket nagpatulong kenkuana. Agingga a naalukoyda isuna nga ited ti P2000 nga inalana ken ti Nokia 3310 a kas kasukat kano ti sanga-bundle a kuarta.

Naladawen idi makitana a papel gayam ti kuarta nga intedna kenkuana.

dannyboy

NARVACAN, Ilocos Sur.  Sakbay nga agleppas ti bulan ti Nobiembre iti daytoy a tawen, manamnama a nalpasen ti Narvacan Commercial Complex ken mangruginto metten ti operasionna.

Daytoy ti naammuan kenni Mayor Edgar Zaragoza iti Narvacan bayat iti interview kenkuana ti DZTP Radio Tirad Pass.

“Yeah, manamnama nga iti daytoy bulan ti Nobiembre ket mangrugin ti operasion ti commercial complex’” kinunana.

Kabayatanna, nakaragsakanda ti kaadda dagiti darakkel a negosio kas koma ti JTC Supermarket ken ti Magic Appliance Center nga adda ditoy.

“Dandani kaguddua ti pasdek ket inabanganda.” Kinunana.

Namnamaenna a daytoy ket agballigi ken aruben dagiti tattao agsipud ta adda a magatang ditoy dagiti amin a kasapulan dagiti tattao.

“Saan laeng a taga-Narvacan, no di ket uray dagiti taga kabangibang a municipalidad ken probinsia ket manamnama nga umay ditoy.”

Kinunana pay a babaen iti income iti commercial complex, mangtulong daytoy iti arapaap ti ili ti Narvacan nga agbalin a siudad.

Ti ngamin revenue ti maysa a pagibasaran iti panagbalin a siudad ti maysa a lugar.  Masapul nga adda P100 a milion nga income ti maysa nga ili tapno mapalubosan nga agsiudad.

Babaen iti mapagtipon a revenue iti IRA ken ti commercial complex, kinuna ti mayor nga adda P100 a milion a mapastrekda.

Candon City.  Kamaudiannanna, naan-anay met laeng a nabigbig ti kinabannuar ni Don Isabelo Abaya idi naipanagan kenkuana ti maysa a kalsada ditoy siudad ti Candon.

Naaprobaran ti ordinansa tapno mabaliwan ti nagan ti Abaya Street tapno agbalin daytoy a Don Isabelo Abaya Street a masarakan ditoy sentro ti siudad.

Daytoy ket babaen iti panangilungalong da bise Mayor Nestor Itchon, konsehal Julio Acance ken Rosario Villalobos iti ordinansa nga addaan bilang 08-043.

Iti maysa a privilege speech ni konsehal Acance, dinakamatna a ti kasasaad ni Don Belong a kas maysa a bannuar ket nabigbigen saan laengen ditoy Candon City no di ket uray pay iti nasional idi daytoy ket pinadayawan ti National Commission on Culture and Arts babaen iti panakairaman ti Candon iti pito a sites iti  simultaneous flag raising ceremony idi Hunio 12, 2008.

Ni Don Belong ti nangideklarar iti panakawaya-waya ti Candon kadagiti nangsakup a Kastila idi Marso 27, 1898 babaen iti panagalsa a naawagan iti Ikkis Ti Candon.

Maipalagip nga awan pay ti naipanagan a kalsada wenno pasdek kenni Don Belong nupay daytoy ket mabigbigbig a Greatest Hero ti Candon.

Candon City.  Kasla kapigsa ti danog ni Manny Pacquaio ta uray la nabtak ti muging ti maysa a lalaki a nadanog iti barangay San Antonio, Candon City.

Ti biktima ket managan iti Salvador Ganapao, 52 anios, residente iti nasao met laeng a barangay kabayatanna a ti suspek nga ala Manny Pacquaio ket managan met iti Filemon Razo, a kabarangayan ti biktima.

Maibasar iti blotter ti PNP Candon, ti biktima ket umin-inom iti beer iti maysa a store a nakasikkawil idi naawanan daytoy ti balanse ket nasagidna ti saka ti sumungsungad a suspek.  Impagarupna ti suspek a kinudtaran isuna ti biktima.

Nakaunget ti suspek ket dinanogna ti biktima iti ngato ti kidayna a nakaigapuan iti panakasugat daytoy.  Nagpaagas isuna iti St. Martin de Porres Hospital.

Danny Antalan