VIGAN CITY. Dagiti napadayawan iti daytoy a Zarzuela Ilocana Festival.

Best Actress-Reysheil Pascua manipud iti Solidnorth Dramatic troupe iti sarswela da a napaulwan "Pammakawan mo Magun-od kon to pay Ngata"Iyaw-awat ni Mayor Marjorie Lagen iti Trophy iti nangabak a best actor a ni Romulo Soller iti 3A's production iti sarswela napaulwan"Diosko Apay a Baybay-annak".Siiimatang met da bokal purisima ken Tudayan

Romulo "JhayR" Soller,Best Actor

Aw awaten ni Myrna Fabie ti trophy ken Gov DV Savellano a kas Best Director iti sarswela da a "Pammakawan mo Magun-od kon to pay Ngata"ti Solidnorth dramatic troupe.

VIGAN CITY. Dagitoy dagiti napusgan a kas hurado a mangpili kadagiti kalalaingan nga agarte iti rabaw iti entablado. Segun ken Mr.Tumacdang kabayatan iti panagsaritana sakbay iti pannakaited kadagiti pammadayaw,  aminda a hurado ket nagbalin a “unanimous” iti pilida a nangabak.

Ti Chairman dagiti hurado a ni Dr.Estrella Soria, Asst. Division Superintendent ket saan met a nakadar-ay iti rabii ti pammadayaw.

Mayor Marjorie Lagen iti Villaviciosa,Abra

Mr.Shan Tumacdang Jr.Division Coordinator for Culture and Arts

Mr. Freddie Lazaro, a multi-awarded journalist,PIA and Manila Bulletin Correspondent

CANDON CITY-”Maiyakar ti opisina ti National Tobacco Administration (NTA) a masarakan iti barangay San Nicolas, Candon City gapu ti pannakaanayna ken kasta metten ti nakaro a panagtedtedna manipud iti bubungan noi panangtutudo,” kinuna ni Chief Agriculturist Juan Bigonia.

Kinunana pay ni Bigonia a madaman ti panagim-impakeda para ti iyaakarda iti kabarbaro nga opisina a masarakan sadiay barangay Calaoaan iti siyudad nga adda iti amianan a paset iti sigud a bodega iti NFA.

Innayon pay ni Bigonia, napadaras ti inyetnag a desisyon iti management ti NTA babaen ti liderato ti OIC Manager Estrel de Peralta ti panagakarda  ti opisina gapu met laeng ti nakaro nga anay ken kasta metten ti panagproblemada no agtudo agsipud ta nakaro met iti panagtedted.  Naammuan pay kenkuana nga adu metten a papeles ti nadadael gapu ti anay ken agraman dagiti caomputerda.

Jeff Barredo

CANDON CITY.Kaaduan a pagadalan ket bassit laeng iti simrek nga agad adal manipud elementarya agingana kolehiyo gapu iti amak dagiti nagannak iti naipadto a napigsa a gingined.

Daytoy iti naobserbaran iti DZTP kabayatan iti panangpasyar kadagiti nadumaduma a pagadalan.Sumagmamano met a mangisursuro iti nangpaawid kadagiti estudyante a nasapsappa.

Iti rimwar gamin iti email a naipakalat iti internet babaen iti maysa a brazilian national, wagwagen kanu iti napigsa a gingined iti pagilyan nga agpigsa iti 8.1 iti agarup alas kuatro iti Hulyo 18 2008 a pakatayan iti adu a tattao. Adu met iti naragsakan gapu ta nagbalin a palso iti nasao nga padto.

Kuna met ni Willy, maysa nga empleado iti gobyerno,adda kan met iti nasayaat a bunga iti palso a padto ta napatibker mane iti pammati Namarsua.

Saan met nga isu daytoy iti nakalapped iti panagiwaras ni Mayor Allen Singson iti bag ken school supplay kadagiti pagadalan elementarya iti Candon City.

CANDON CITY.Sinuspende ni City Mayor Allen Singson iti klase iti amin nga level iti daytoy a syudad gapu iti napigsa a tudo ken pannakalayus kadagiti nababa a paset ti syudad nga epkto iti pumanpanawen a bagyo helen.

Naiparwar iti nasao nga suspension iti klase itay parbangon.Kinuna ti mayor a babaen iti pannakasuspinde iti klase ket maiyadayo dagiti agad adal iti peggad nga itden iti napigsa a bayakabak ti tudo.

Iti kaudian a waragawag

nagoverflow iti karayan gapu ti pigsa ti tudo ni bagyo helen

iti PAGASA ket awan metten iti nakabatog a signal ti bagyo helen iti probinsya nag ilocos sur.

Daytoy ti kaunaan a gundaway iti daytoy a tawen nga nagsuspinde iti klase ti nasao a mayor.

VIGAN CITY. Nauram itay parbangon  ti faculty room iti UNP Main Campus Vigan City a nakaalarmaan dagiti agindeg nga asideg iti nasao a pagadalan.

Segun ken ni SFO1 Elvie Vincent Pascua,alas tres y media kan tay parbangon,itay makaawat iti tawag manipud kadagiti agindeg sadiay a maur uram iti nasao nga pasdek.Dakkel kan metten iti uram idi makadanun dagiti bombero.Awan kan metten a pulos iti nasalbar da agsipud ta dimmapun iti nasao a pasdek.

Iti imbestigasyon iti Bureau of Fire Protection iti Vigan City,dua nga angulo iti inda ita sursuroten a posible a nakaigapwan iti uram.Umuna,Panagoverheat iti maysa nga appliances iti uneg a saan a naikkat iti saksakna,Maikadua,posible kan met short-circuit iti nakaigapwan iti uram.

Numampay no iti kasta,saan da kan met nga ik ikkaten iti imbestigasyon da nga posible a naigagara iti pannakauram iti pasdek.

Patta pattaen dagiti bumbero nga agarup maysa milyon iti nadadael.

Santa. Nagaboran iti sumagmamano a paset iti national highway iti daytoy nga ili gapu iti panagreggaay iti bantay a nakastrandedan dagiti lugan itay laeng agsapa.

Iti interview iti DZTP Radio Tirad Pass ken Engr.Rey Elaydo iti 2nd engineering district ti Department of Public Works and Highways iti probinsya,ti napigsa kan a bayakabak nga it-itden ni bagyo Helen iti posible a rason iti pannakargaay iti bantay a nanggabor iti kalsada national.

Numampay no iti kasta,kuna ti engineer nga nadalusanda a sigida ti nagaburan a kalsada sadiay sitio Pideg,Brgy.Magsaysay District,Santa Ilocos Sur ket nakadaliasat kan met laeng insigida dagiti lugan itay bigat.

“adda amin dagitay equipment mi didiay nga mangiwal walin kadagiti daga a naigabor iti kalsada ken kasta metten a mangkita kadagiti minor laeng a panagrubnay” kuna iti engineer.

Pinasingkedan na met a pasable pay laeng iti dalan a mapan Cervantes gapu ta adda kan a nakabantay didiay dagiti Contructor nga ITAL-THAI a mangar aramid iti Suyo-Cervantes Road.Kasta metten nga awan kan pay met iti report a landslide iti Banayoyo-San Emilio road.

Ti probinsya iti agdama ket makapadpadas iti napigsa a bayakabak iti tudo ngem awan iti napigsa nga angin a par parnuayen  ni bagyo helen.Ballaag numero uno iti adda a naikabatog agdama.

Candon City.  Lima nga rice buying station  ti naipasdek iti daytoy a siyudad babaen iti National Food Authority (NFA) tapno adda asideg a paggatangan dagiti napapanglaw nga umili.

Daytoy man ti naammuan kabayatan ti interview kenni Mr. Erlito Cacayurin, . Kinunana a dagiti lima nga NFA rice buying station ket iti Sitio Korea, Barangay Calungbuyan, Sitio Pating, Barangay Paypayad, Barangay Oaig-Daya, Barangay Caterman ken Barangay Tablac.

Segun kenni Cacayurin, dagitoy lima nga NFA rice buying station ket naipasdek kada sona tapno isu ti paggatangan dagiti napili a karrubana a barbarangay. Inpatalgedna nga 18.25 pisos ti tunggal kilo ti panagilako dagiti nasao a pagtagilakkuan ti bagas.

25 a kaban ti NFA rice iti maideliver tri tunggal lawas iti maysa a pagtagilakkuan kuna ni Cacayurin. Prioridad kano met dagiti marigrigat wenno indigent nga adda iti listaan nga umona a  malakkuan. Lima agingana 20 kilos iti posible a magatang ti maysa a pamilaya depende iti bilangda iti kada lawas.

Dagitoy a pagtagilakkuan  ti NFA  rice ket  pinili ti  City Social  Welfare and Development Office (CSWD) nga idadauluan ni Alma Gabor a banag met a sinuportaran ni City Mayor Allen Singson.

Jeff Barredo

Candon City. Nawayawayaan ti maysa a balud iti Candon Police station idi kalman, kalpasan a daytoy ket nakapagpiyansa.

Ni Alejandro Garlejo y Raiz, alyas Lito, 49-anyos, naasawaan, mannalon ken residente iti barangay Tablac, Candon City  ti nabalud ti 24-oras, gapu iti kaso a naipila kontra kenkuana nga slight physical injuries.

Babaen ti release order nga inparruar Judge Modesto Quismorio iti MTCC Candon City, temporaryo a nawayawayaan ni Garlejo manipud iti pagbaludan. Ni Garlejo ket nagpiyansa ti agganay dua ribu a pisos.

Maipalagip nga inaresto dagiti pannakabagi ti linteg ni Garlejo babaen ti bileg ti warant of arrest nga inpaulog met laeng ni Judge Quismorio.

Jeff Barredo

            CANDON CITY.  Nayospital ti maysa a lalaki gapu iti sugat a linak-amna idi daytoy ket dinungpar ti maysa a motorsiklo iti barangay San Antonio, Candon City.

            Ti biktima ket managan Joseph Enrade, 25 anios, residente iti barangay Tablac, Candon City, kabayatanna a ti mapapati a nakadungpar ket managan Michael Gadingan, 17 anios, residente iti Parioc Segundo, Candon City.

            Iti imbestigasion dagiti panakabagi ti linteg, ti biktima ket bumallasiw iti kalsada, iti batog ti Mercury Drug Store idi daytoy ket aksidente a nadungpar ti motorsiklo nga MCX, awanan iti plaka ken minaneho ti nasao a drayber.

            Gapu iti sugatna iti ulo ken likod, naitaray daytoy iti Candon General Hospital para iti panakaagas kenkuana.