SANTIAGO, Ilocos Sur. Nasugatan ti dua a lalaki iti aksidente iti traysikel ken Partas Bus idiay barangay Bigbiga itoy nga ili.

Ti traysikel ket Honda TMX 155 ket minaneho ni Jojo Nartatez, 32 anios, residente iti Saoatan, Bangued Abra kabayatanna a ti Partas ket addaan body number 821888, ket minaneho ni Renato Mauricio, 46 anios, residente iti Agtangao, Bangued, Abra.

Iti inisial nga imbestigasion, ti Partas ket agpa-abagatan idi aksidente a nasapgidna ti traysikel gapu iti nakapsut a silawna.

Ti drayber ti traysikel agraman ti kadduana a ni Edward Pantil, 39 anios, ti nasugatan gapu iti aksidente.

SAN ESTEBAN, Ilocos Sur. Natay ti maysa a baket kabayatanna a nasugatan ti maysa nga Indian national  iti aksidente a napasamak iti barangay Poblacion itoy nga ili.

Ti biktima ket managan Thelma Caceres, residente iti nasao a lugar kabayatanna a ti Indian national ket managan met Singh Amadeep, 19 anios, residente met iti San Jose, Candon City.

Iti inisial nga imbestigasion, agpatpataray iti national highway ti Bombay babaen iti motorsiklona a Honda Wave, addaan plaka AB-6046 idi bumallasiw iti national highway ti baket manipud laud ket ditan a napasamak ti aksidente.

Nakaro a nasugatan dagiti dua ket naitarayda iti ospital. Naaddaan pay iti nakaro a panakadadael dagiti luglugan.

SANTIAGO, Ilocos Sur.  Nabagsol ti likod ti maysa a lalaki idi daytoy ket naganawa idiay barangay Poblacion Norte, itoy nga ili.

Ti biktima ket managan Joel Espia, 27 anios, residente iti poblacion norte, itoy nga ili kabayatanna a ti mapapati a suspek ket managan Marvin Egar, residente met iti barangay Mambug, Santiago, Ilocos Sur.

Iti inisial nga imbestigasion, ti biktima ket mangmangan iti pangrabiina, idi adda nangngegna nga agriri iti ruar ti balayda, naganawa daytoy ngem ti suspek a ni Marvin Egar ti nangbagsol iti likodna.

Naipan iti ospital ti biktima para iti panakapaagas kenkuana.

NARVACAN, Ilocos Sur.  Gapu iti paputok, maysa a lalaki ti nabagsol idiay barangay Dinalaoan, itoy nga ili.

Ti biktima ket managan Ronaldo Camarillo, 33 anios, residente iti nadakamat a barangay kabayatanna a ti suspek ket managan Santiago Cabello, 66 anios, iti isu met laeng a lugar.

Iti inisial nga imbestigasion, ti biktima agraman ti dua a kadduana ti magmagna nga agawid idi adda naglibang a paputok.  Ti suspek nga adda iti dayta a gundaway ti nangpabasol kadakuada a nagtungpal iti nabara a saritaan.

Idi simrek ti biktima iti lakon ti suspek, ti biktima ti nangmalo iti suspek a nakaalaan iti pingping, lapayag ken ima ti suspek.

Idi bimmales ti suspek, natirwanna ti barukong ti biktima. Naitaray daytoy iti ospital kabayatanna a simmuko ti suspek iti barangay officials.

Kamaudiananna, addan ti paggatangan dagiti kaprobinsiaan iti nalaka nga agas.

Addan a nangrugi ti panaglako ti Botika ti Probinsia ti Ilocos Sur.
Indauluan mismo ni Gobernador Deogracias Victor Savellano ti pormal a panakalukat ken blessing ti botika a sinaruno ti pinnirma iti biang ti provincial government ken dagiti manufacturers ti agas a mang-supply iti mailako nga agas.

“Gapu iti adu a problema dagiti ospital iti probinsia gapu a nangkitatayo iti wagas iti panangtulong kadagiti kaprobinsiaan.” Kinuna ti gobernador bayat iti interview kenkuana dagiti kameng ti media.

Inlawlawagna a kanayon a maidandanon iti opisinana ti kaawan iti agas wenno saan a de-kalidad nga agas ti magatgatang gapuna a napanunot ti panakaipatakder iti Botika ti Probinsia.

“Dagitoy a pharmaceutical companies ket i-consignda ti agas iti botika iti probinsia nga isu met ti mangsuplay iti parmasia ti naduma-duma a district hospitalstayo.” Panangilawlawag pay ti gobernador.

Ket agsipud ta direkta ti panakagatang dagiti agas, kinuna ti gobernador a nalaklaka ti magatang ditoy nga agas.

Idi nadamag no nababbaba agingga iti 20 porsiento, kinunana nga amangan no nababbaba pay ngem iti daytoy.

Ti Botika Ti Probinsia Ti Ilocos Sur ket naparnuay babaen iti executive order 12 ti gobernador a daytoy ket naratipikaran met babaen iti resolusion ti Sangguniang Panlalawigan ti Ilocos Sur.

Banayoyo, Ilocos Sur. Umadanin ti Todos Los Santos, ket madama kadagitoy a pakaburiboran dagiti umili ket ti panakasimpa iti panteon dagiti minatayda.

Iti ili ti Banayoyo, maysa kadagiti proyekto nga insayangkat ti local government ket ti panakadalus ken libre a panakapintura kadagiti amin a panteon iti lima a sementerio.

Naammuan daytoy bayat iti panakiuman-uman kenni Sangguniang Bayan Member Santos Bayaya.

Dagiti lima a sementerio itoy nga ili ket masarakan iti Poblacion, Pila, Elefante, Banbannaal ken barangay Lopez.

Malaksid iti libre a panakapintura iti amin a panteon, maikkan pay dagitoy iti silaw intono Oktubre 30, 31, Nobiembre 1 ken 2.

“Adu latta ngamin dagiti mapmapan mangsarungkarda iti minatayda iti rabii.” Kinuna ni Sangguniang Bayaya.

Inkalikagumda laeng a makipartisipar koma dagiti umili iti daytoy a programa ni mayor Severino Galanga babaen iti panangdalusdan kadagiti panteon ti minatayda tapno naparpartak ti panakapintura kadagiti panteon.

Maipalagip a kannawidanen ni Ilocano a sarungkaran dagiti minatayna no madanon ti Todos Los Santos. Nupay kasta, gapu ta kapades ti panagapit ti pagay, adu pay laeng kadagitoy ti mangitantan tapno mauna ti panaggapas.

Milion a gatad a dadael manipud iti biang iti inprastraktura, agrikultura, dinguen, ken balbalay ti inbati ni Bagyo Pepeng iti makalawas a panagbasnotna ditoy probinsia ti Ilocos Sur.

Pakairamanan pay ditoy ti maysa a natay ken 2 a mapukpukaw.

Daytoy ket kas maibasar iti report a naala manipud iti opisina ni Gobernador DV Savellano.

Iti naala a report, naapektaran ti 34,592 a pamilia wenno 104,690 nga indibidual manipud iti 353 a barangay ditoy Ilocos Sur. Kinasapulan ti P20 a million a kas relief assistance.

Iti biang iti inprastraktura, agarup iti P102 a million ti dadael iti kalkalsada, P100 a million iti seawalls, P17 milion iti provincial roads, ken P28 iti rangtay wenno agdagup daytoy iti P248 a million a pesos.

Agarup met iti P80 a million ti dadael iti agrikultura, pakairamanan ditoy ti P45 milion iti pagay, P30 iti fisheries, P323,000 iti mais ken P4 milion iti dadduma pay a mula.

Iti dinguen ket agdagup iti P13 ti dadael a pakairamanan ditoy ti 350 a baboy, 128 a baka, 902 a kalding, 59 a nuwang, 23,532 a manok ken dadduma pay.

Iti pakabuklan, aganay iti P340 milion ti dadael iti sibubukel a probinsia gapu iti panangsaplit ti bagyo a ni Pepeng.

Kabayatanna, aganay met iti P56 milion ti partially damaged manipud iti 1,424 a pagtaengan ken P11 a million para iti 141 a totally damaged a pagtaengan. Aganay iti 32,850 ti narenneb iti layus a balay ken sumagmamano a balay iti Oribi, Dammay iti Santa ken Gregorio del pilar tin a-isolate.

Maysa ti natay a daytoy ket ni Delia Cabjuan iti Santa Maria, Ilocos Sur, ken 2 ti mapukpukaw iti Tubalina, Gregorio del Pilar.

Agtultuloy met ti isaysayangkat a relief ken medical mission ti provincial government agraman ti opisina da Congressman Eric Singson, Congressman Ronald Singson, ken dagiti naduma-duma a siudad ken ili ditoy probinsia ti Ilocos Sur.

SANTIAGO, Ilocos Sur.  Naipila ti kaso a robbery with frustrated homicide ti lalaki a suspek a nangholdap iti maysa a babai idiay barangay Dan-ar, itoy nga ili.

Ti suspek a ni Marvin Supnad, alyas Insik, residente iti barangay Dan-ar, Santiago, Ilocos Sur ti naipilaan ti kaso iti municipal trial court.

Maipalagip a ti suspek ti nangholdap ken nangbagsol iti biktima bayat nga agaw-awid ti biktima manipud iti trabahona.

Nupay kasta, ti suspek ti naglibas manipud iti pagbaludan, maysa nga aldaw sakbay a maipila ti kaso kontra kenkuana.

BURGOS, Ilocos Sur.  Ti ili ti Burgos ti maysa kadagiti kaudian nga ili a mangpappapintas iti municipal hall buildingda ditoy Ilocos Sur.

Daytoy ket mainaig iti agdama a panakasimpa iti facade ti munisipio ti daytoy nga ili babaen iti panakabil iti agdan ken luminous green nga atep.

Iti interview kenni Mayor Nathaniel Escobar iti daytoy nga ili, kinunana a daytoy ket babaen iti panangilatangda iti pondoda.

“Inikkanmi ti agdan ti sango, a daytoy ket umuli iti maikaddua a kadsaaran tapno saan unay a marigatan nga agdiretso kadagiti opisina iti ngato ken pumintas iti sango ti balay ti ili.” Kinunana.

Kabayatanna, inabrasa met dagiti kakailian ti Burgos, Ilocos Sur ni mayor Escobar iti panagkangayna idi Septiembre 10, 2009.

SANTIAGO, Ilocos Sur.  Maysa nga XRM ti mapapati nga intaray ti maysa a menor de edad manipud Candon City ngem nasarakan iti barangay Salincub, itoy nga ili.

Ti XRM ket maris asul, addaan plaka 5690-AH, a daytoy ket kukua ni Rodrigo Ponsoy, iti barangay San Agustin, Candon City.

Ti suspek a menor de edad ket mailinged laengen iti nagan Jerry, residente iti Santigo, Ilocos Sur.

Ti panakasarak iti motorsiklo ket babaen iti panangipakaammo dagiti barangay officials iti Salincub nga adda iti nasao barangay ti lugan iti ikot ti suspek.

Kinuna ti akinkukua a daytoy ket naiparking iti balayda ngem kabigatanna ket awanen a masarakanda ti lugan.

Nai-turn-over met ti lugan ken ti suspek iti kuerpo iti pulisia iti Candon