Santiago, Ilocos Sur-”Daytoy summer job ket inlunsad iti lokal a gobierno iti ili ti Santiago babaen ti liderato niMun.Boy Miranda a babaen ti partnership ti DOLE-Provincial Office.”Daytoy ti nabatad a kinuna ni Mun. Planning Officer Nenita Rebucan.

Kinuna ni MPDC Officer Rebucan a daytoy nga tawen ket adda ti naiyalokar a gatad 40,ooo pisos manipud iti 25% iti internal revenue allotment iti daytoy nga ili tapno isu ti naaramat a nangpondo iti daytoy a programa.

Naammuan pay kenni Rebucan nga ita a tawen ket adda ti 10 nga SPES worker, manipud agtrawenda ti 15 agingana 25; mabalin nga high school wenno college.

Naammuan pay ti nasao nga opisyal a dagitoy sangapulo ket nagtaudda ti marigrigat a pamilya a ti income da ket 36,000 pisos nga agpababa iti taxable income ken kangrunaanna ti amin a dagitoy napili ket naggapuda kadagiti annak dagiti mannalon.

Naammuan a dagitoy ubbing a nag-summer job ket nangrugida idi Abril 13 agingana Mayo 25 ti pakabuklan a 30 nga aldaw a panagtrabahoda ken addaan ti rate da a 200 a pisos ti tunggal aldaw.

Naammuan pay a 60% ti suweldoda ket naggapu iti munisipyo idinto ti nabatbati a 40% ket ibaklay met iti DOLE ken agtrabahoda manipud iti oras alas otso ti bigat agingana alas dose ti aldaw ken ala una agingana alas singko ti malem.

Jeff Barredo

SANTIAGO, ILOCOS SUR – “Awan ti pabpabasulenmi ti napasamak a pannakalmes ti misterko.” Daytoy ti nabatad a kinuna Mrs. Benita Gamueda, 54-anyos, ken residente iti sitio Tagaytay, brgy. Ambucao, Santiago, Ilocos Sur, a misterna ti biktima a ni Prudencio Sabado y Gamueda, 52-anyos ken residente met laeng iti nasao a lugar, babaen ti interview ti Radyo Tirad Pass iti programa Arrangkada.

Kinuna ni Mrs. Benita Gamueda sakbay a timmapog ti misterna a napan nagpana ti ikan sadiay baybay ket dumawdawat ti igatangna ti arak, inikkan ti anakna ti ingatangna ngem ti biktima ket adda ti inumnan idi. Kinunana pay a ti nakaugalian ti misterna ket isuna ti aglutluto ti parbangon, ngem nadlawna ti dalikan ket saan a naarunan kasta metten dagiti arruatenna a pagkalap ket awan pay.  Kinunana pay iti interbiew a napan ngamin naturog iti balay ti maysa kadagiti annakda a naasawaan, isu a masmasdaaw laengen a saan a simmangpet a nagpatnag.  Naammuan pay a nagtitinnulong dagiti residente iti dua a barangay Ambucao ken brgy. Apatot, San Esteban, Ilocos sur.  Nasarakan ti bangkayna iti lugar a nagkalapanda ti karabbianna sadiay kabaybayan iti brgy.  Apatot, ken sigida met a naiyawid ti bangkayna sadiay pagtaenganda para ti pannakaestimarna.

Ti interview pay iti Radyo TIrad pass kenni Ariel Sabado, kaanakan ti biktima ken karruba daytoy ket talloda a nagakukuyog a timmapog iti baybay, ngem idin ta immadalemen ti rabii, pinagtemkanda ti biktima ta agawiddan ngem imbaga ti biktima nga umun-unadan.  Innayon pay ni Ariel a masansan a kasta ti mapaspasamak, masolona ti agkalap nga agmaymaysa.

Ti interview met ti radyo Tirad pass kenni Chief of Police , Police Insp. Roy Rafanan, ti imbestigasyonda, posible a ti biktima idi  bimmatok ti nauneg a pasetna iti baybay nga immusok kadagiti rukibna iti tangrib ket nagpundi diay flashlightna, isu nga idin maangsan saanna a nakabisado ti rimmuaranna.  Innayon pay ti nasao nga opisyal a nabartek ti biktima.

Napasamak ti nasao nga insidente idi rabii ti huwebes ket nakita laengen ti bangkay ti biktima iti kabaybayan ti brgy. Apatot, San Esteban, Ilocos Sur, sigida met a nirespondian dagiti pannakabagi ti linteg.

jb

CANDON CITY, ILOCOS SUR – Natay idi parbangon kalman ti driver ti motorsiklo a nangdungpar ti maysa a van, a napasamak idi rabii ti sabado aggarup oras alas 11:30 iti national highway, barangay San Juan, Candon city.

Ti biktima ket isuni Jayford Manzano, 18-anyos, baro, awanan ti lisensia, residente iti brgy. Lintic, Banayoyo, Ilocos Sur,  a daytoy ti nagmaneho iti matorsiklo a Honda TMX, agmaris ti asul, awanan ti plate number  ken ti kinasakayna ket isuni Ariel Gamata y Aglibut, 25-anyos, baro ken kalugaran met laeng ti driver.

Idinto ti aksidente a nadungparda ket maysa nga Lite Ace Van, addaan ti plate number TAN 199, agmaris ti asul ken minaneho ni James Montemayor y Gabieres, 55-anyos ken kameng ti BFP-CANDON agik-ikut ti professional drivers license ken residente iti siyudad ti Bagiuo.

Ti imbestigasyon dagiti pannakabagi ti linteg, ti Lite ace van ket agdaldalyasat idi iti national highway nga agturturong iti amianan a direction, naklaat laengen ti driver ti van idi adda ti nangdungpar iti likudanna, sigida a nagsardeng ken dimsaag, nakitana laengen a dagiti biktima a napasagda iti likudan iti van a kinaludonda ti motorsiklo a naglugananda.

Nagsagaba ti nakaro a pannakasugsugat dagiti biktima a nagkasakay ti motorsiklo, sigida a naitarayda sadiay City of Candon Hospital. Ti motorsiklo ket nakaro ti pannakadadaelna, idinto ti van nga agdama a kustodya dagiti pannakabagi ti linteg ket nakuppit iti likudan a paset ti kaha daytoy.

Naammuan kadagiti polisya ditoy Candon itattay, natay ti biktima idi parbangon kalman bayat ti pannakatamingna iti nakaitarayanna nga ospital.

JB

SANTIAGO, ILOCOS SUR -” Saan a naideklara a ‘calamity area’ iti ili mi, gapu met laeng ta saan a nakaro ti sinagabana ti simmangbay a bagyo Karen.” Daytoy man ti inbatad ni Vice Mayor Virgilio Pasion, ti interview iti Radyo Tirad Pass kenkuana.

KInuna ni Vice Mayor Virgilio Pasion, a sumagmamano met a kalsada dagiti nagabgaboran kangrunaanna kadagiti adda iti pasetna iti depaarna ti daya ken iti adda bantayna gapu met laeng ti landslide, nupay kasta manarimaan metten nga iwakwaknit ti municipal loader dagiti a tubeng a daga a naigabor iti kalsada, mainaig pay ti fishpond, iti brgy. Sabangan laeng ti naawatda a report gapu ti pannakalayosda kadagiti papakan ti lames. Nupay kasta kinunana nga awan met ti nakaro a nadaddadael iti biang ti infra, uray iti biang ti agrikultura ket adda met kadagiti sumagmamano dagiti nagaburan a kapagayan.

Innayon pay ni Vice Mayor Pasion, a saan met a naideklara a ‘calamity area’ iti ilida nupay adda ti report a naddadael manipud kadagiti nadumaduma a barbarangay tapno maaramatda koma ti lima a porsiento a kalamity fund da, ngem madama met nga ad-adalenda no kasano ti panangipaayda ti panangtulong kadagiti kalugaranda a nadidigraan.

Maipalagip, kinuna ni Vice Mayor Pasion a nagiwaras metten ti relief goods ti lokal a gobierno babaen ti liderato ni Municipal Mayor Boy Miranda, nga iti opisina ti DSWD ti nangimaton daytoy a nagturongda kadagiti nadumaduma a barbarangay. Aggarup lima pulo ket lima a caban ti NFA a bagas kasta metten noddles ken dadduma pay para kadagiti nadidigraan ti napalabas a bagyol.

Santiago, Ilocos Sur- Kamauddiananna, adda met laengen ti nakaitured a mangpukan iti mapagbutbutngan a duduugan nga acacia.

Segun kenni Vice Mayor Virgilio Pasion, nabayagen nga adda ti gandat a panangpukan ti puon ti acacia a masarakan iti nagsulian ti national highway ken ti kalsada  nga abagatan iti public market nga agturong iti simbaan katoliko, babaen met laeng ti inyetnag a desisyon iti gobierno municipal ken iti simbaan katoliko gapu met laeng nga iti aniaman a gundaway ket mangted ti disgrasya ti siasinoman nga adda iti asideg daytoy.

Inlawlawag ni Vice Mayor Pasion, a ti nasao nga acacia ket adda ngamin abot iti puonna, ken kasta metten  ineksamin pay ti  biang iti Department of Environment and Natural Resources, nga isu ti nangipalubos a mapukan ti nasao a kayo, a daytoy ket naidalan ti umiso ken legal a proseso.

Maipalagip nga uray idi pananwen ni Fr. Barroga, ket addan ti gandat idi a panangpukan ti duduugan nga acacia ngem saan nga intuloy a pinukan dagiti nakipatangan iti gobierno lokal ken simbaan katoliko gapu kano met laeng  ta  adda dagiti  naisangsangayan a nariknada kas koma ti panagsakit kadagiti kameng iti pamilyada.

Jeff Barredo

CABUGAO, ILOCOS SUR.Natatek idi bala iti calibre 45 tikapitan a biktima iti pammaltog iti daytoy nga ili babaen kadagiti di nabigbig  a suspek idi  rabii ti domingo.

Nabigbig ti biktima a ni Ely Agustin,naasawaan ken agdama a kapitan iti barangay Pug-os.

Segun iti initial nga imbestigasyon dagiti kameng iti PNP Cabugao,ti biktima ket adda iti dalan na a mapan kuma mangiyapon iti baka daytoy a nakawayway iti igid iti kalsada iti barangayda.idin ta adda iti nagsardeng kano a motorsiklo a nagluganan dagiti maatap a suspek ket dita metten a pinaltopaltogan da idi nasao a kapitan.

Naitaray kano a dagus iti kapitan iti Suero Clinic and Hospital ngem natay kabayatan a maag-agasan.

Di pay ammo iti motibo iti nasao a pammapatay.