SANTA LUCIA, Ilocos Sur. Maysa ti natay gapu iti aksidente a napasamak iti 5 a lugan, maysa ditoy ti government vehicle, a napasamak iti national highway, barangay Angkileng itoy nga ili.

Natay iti aksidente ni Herminia Dasalla iti Santa Maria, Ilocos Sur. Kabayatanna nga adu ti nasugatan.

Dagiti lugan ket pakairamanan ti motorsiklo a Kawasaki Fury, minaneho ni Amancio Dasalla ken kadduana a naglugan ti asawana a ni Herminia Dasalla, mangisursuro, residente iti Lingsat, Santa Maria, Ilocos Sur; traysikel, addaan plaka FX-8414, minaneho ni Ernesto Fernando a kadduana met ni baketna a ni Gloria Fernando, agpada a residente iti Namatican, Santa Lucia; Suzuki a motorsiklo, addaan plaka 5499-AE, minaneho ni Paul Jomar Aquino, 21 anios, residente iti Barangobong, Santa Lucia; Florida Bus, addaan plaka BVS-524, minneho ni Paulino Richard Delegado, residente iti Fairview Park, Quezon City; ken Toyota Revo, addaan plaka SGS-702 (red plate), minaneho ni Benjamin Lucena, residente iti Dalumpinas Oeste, San Fernando City, La Union.

Iti inisial nga imbestigasion, ti Revo ket agpa-abagatan idi addan iti sango municipal station, nadungparna ti motorsiklo a Fury iti sango, sa ti traysikel ket nadungpar met ti traysikel ti Florida Bus a naka-parking ta agiluglugan.

Mapapati a nagdiretso latta ti Revo a di pay nagpreno agingga a nadungparna manen ti maysa a motorsiklo ngem nagdiretso latta nupay naisab-it ti motorsiklo agingga nga indungparna iti poste ti koriente tapno maikkat koma ti motorsiklo a naisab-it ken makaliklik iti pulisia.

Nakaru a nasugatan dagiti biktima ket naitarayda iti ospital kabayatanna a mapapati a nabartek ti drayber ti government vehicle a nakaigapuan ti aksidente.

Agtultuloy ti imbestigasion ti pulisia.

SANTA LUCIA, Ilocos Sur.  Agkurkurang ti bin-in a mani, gapuna nga indardarirag ti opisial ti nainget a panaggatang koma iti daytoy a produkto itoy nga ili.

Daytoy ti naammuan kenni bise mayor Estrella Hernaez itoy nga ili, bayat iti interview kenkuana ti DZTP Radio Tirad Pass.

“Wen, agkurkurang ti bin-i,” kinunana.

Mainaig iti daytoy a banag, kinuna ti bise mayor a kangrunaan nga ipagpagnada ita ket ti panangibilinda iti asosasion iti barangay Luba, ti panagmula iti ad-adu a mani tapno ad-adu met laeng ti produksionda ken mangpaaddada met iti bin-i.

“Adda ti inted ti DOLE a tulong, P500,000 dayta, kayatmi koma a dibdiban ti panagpamula.”

Inlawlawagna pay a kalpasan ngamin ti panang-harvestda iti mani, kaadduanen kadagitoy ti rummuaren a gatangen dagiti buyer manipud iti Pangasinan, Manila ken dadduma pay.

“Agkalkali pay laeng ni mannalon, gatangendan ti mani… no kuan awanen ti mabati.”

Ti mani ngamin ti kangrunaan nga One Town One Product ti daytoy nga ili gapuna a kasapulanda latta met ti ad-addu a produksion tapno adda ti aramatenda kadagiti produktoda kas koma iti peanut brittle, peanut butter, peanut porboron ken dadduma pay.

Malaksid iti bin-i, kasapulanda pay ti mani para iti processingda kadagiti nasao a produkto.

SANTA LUCIA, Ilocos Sur.  Agsipud ta adda latta dagiti restaurant nga agop-operate kas videoke ken addaan pay dagitoy iti mapapati a GRO, inadal manen ti Sangguniang Bayan daytoy nga ordinansa.

Iti naangay a regular a sesion dagiti kameng ti konseho iti panangidaulo ni bise-mayor Estrellla Hernaez, naipaukag ti nasao nga ordinansa tapno adalen a naimbag daytoy.

Daytoy ket gapu iti mapapati a panaglabsing dagiti addaan iti restaurant ken videoke nga aglablabes ti operasionda, partikular ditoy ti kinaadda dagiti babbai ken nalabes nga oras nga operasion.

Mainaig iti daytoy, dagitoy a puesto ket masapul a mangala iti sabali a permiso para iti videoke, awanan iti chicks, di aglako iti nasanger, ken agpatingga laeng iti alas dies ti operasion kadagiti videoke.

Kas napagnunummuan, maibaon ti pulisia tapno kitaen daytoy a banag, ken mangipaskilda pay iti ordinansa kadagitoy nga establisemento.

Maipalagip a kadagiti napalabas a bulbulan, nainget a kinondinar dagiti umili ti Santa Lucia dagiti beerhouses ken videoke agsipud ta dagitoy ket mangidateng iti naalas nga imahe iti daytoy nga ili.

SANTA LUCIA, Ilocos Sur. Porcine Reproductive and Respiratory Syndrome wenno PRRS virus ti gapu ti panakatay ken panagsakit dagiti baboy iti uppat a barangay iti daytoy nga ili.

Daytoy ti naammuan iti beteranario iti Candon, daytoy ti impadamag kenkuana ti agdama a provincial veteranarian a ni Dr. Mendoza iti probinsia ti Ilocos Sur.

Mainaig iti daytoy a banag, mangisayangkat metten iti addan ti Candon City tapno maliklikan ti panagraira ti sakit itoy a siudad nangruna ta kaarruba laeng ti Santa Lucia.

Daytoy ket kalpasan a rimmuaren ti resulta iti naala nga specimen kadagiti baboy a nabutiakan tapno maala ti gapu iti panagpatay dagiti tarakenda.

Kabayatanna, agur-uray pay laeng iti tulong-pinansial dagiti nagkaadu nga umili a nalugi gapu iti panagpatay ti baboy iti Santa Lucia.

Bimmaban ti presio ti baboy gapu iti buteng dagiti agindeg a gumatang iti karne gapu pay laeng iti amakda nga agsida.

Maipalagip a gasut a baboy ti natay ken ginasut a sabali pay ti naapektaran gapu iti panagraira ti daytoy a sakit itoy nga ili.

Pagdandanagan a malaksid iti uppat a barangay ita, ket posible pay nga agwaras daytoy iti sabali nga ili.

Santa Lucia, Ilocos Sur. 11 ti nasugatan idi nag face to face ti maysa a mini bus ken closed van iti aksidente a napasamak agarup alas sais iti parbangon iti barangay San Juan itoy nga ili.

Ti Minibus ket Chredcel, addaan plaka AVZ-883 ken minaneho ni Christopher Batin, residente iti Banaoang, Santa, Ilocos Sur, konduktorna ti managan Michael Burgos, residente iti isu met laeng a lugar.

Ti closed van ket addaan plakaRFD-717, minaneho ni Teddy Candelaro ken kadduana met ni Homer Cruz, residente iti Malolos, Bulacan.

Iti inisial nga imbestigasion, ti minibus ti agturong iti abagatan kabayatanna a ti closed van ti agturong met iti amianan idi mapapati nga inalana ti linia ti minibus ket ditan a napasamak ti aksidente iti kurbada.

Nasugatan dagiti draybers ken dagiti kadduana, agraman dagiti pasaheros a pito a sabsabali pay.

Agtultuloy ti imbestigasion ti pulisia.

dannyboy

Santa Lucia, Ilocos Sur.  Sabali manen a biag ti nakeltay iti maysa manen nga aksidente a napasamak iti national highway iti barnagay Suagayan, iti daytoy nga ili.

Ti biktima a natay ket ni Benjamin Habon, Jr. 15 anios, residente iti Cabaritan, Santa Lucia, Ilocos Sur.

Iti inisial nga imbestigasion ti pulisia, ti biktima ket agmanmaneho iti motorsiklo nga RS 100, insakayna ti inun-una a kabsatna a managan Leonard Habon, 17 anios.

Kabayatanna, ti sabali a lugan ket Honda SR 125 a traysikel, minaneho ni Ronel Soliman, 22 anios, taga-Kibungan Benguet ngem agnanaeden iti barnagay Man-atong, Suyo, Ilocos Sur.

Naitaray dagiti agkabsat iti Candon City Hospital ngem natay ni Benjamin kalpasan iti sumagmamano a kanito.

Kabayatanna, naitaray met iti Santa Lucia District Hospital ti drayber ti traysikel para iti panakaagas kenkuana.

Santa Lucia, Ilocos Sur.  Awan ti naglangan kadagiti kameng ti Sangguniang Bayan iti dyatoy nga ili iti panakaisayangkat ti regular sessionda iti daytoy nga aldaw.

Indauluan ni Vice Mayor Estrella Hernaez dagiti kameng ti Sangguniang Bayan iti sessionda iti daytoy nga ili.

Dagiti dadduma pay a kameng ti Sangguniang Bayan ket da Konsehal Eduardo Toquero, Anneline Bravo, Glicerio Rosal, Jr., Sotero Avila, Rex Costales, , Purificacion Halabaso, Allen Habon, Narciso Garcia, ABC President Artemio Cuenta ken SKF pres. Joana Loreen Valdez.

Pakairamanan kadagiti tinaming iti session ken ti ordinansa a mangregulate iti videoke iti daytoy nga ili, ti resolusion tapno mabawasan ti mapaspasamak nga aksidente iti ili, panakapaadda iti patrol car ti PNP, ti proposed a relokasion ti Public Market ti ili ken dadduma pay.

Nagbalin a nasayod ti deliberasion kadagiti banbannag partikular kadagiti ordinansa ken resolusion a nairuangan.

dannyantalan

Santa Lucia,Ilocos Sur. Dead on arrival iti hospital ti nainget a suporter ni Rambo Rafanan kalpasan a pinalto-paltogan dagiti suspect itay laeng bigat.
Nabigbig ti biktima a ni Amado “madi” Ricanor,nataengan ken residente iti brgy. San Juan,Santa Lucia.
Iti imbestigasyon iti PNP Santa Lucia,gapgapu iti biktima a nagitulod iti anakna iti pagadalan ket idin ta agsubli iti pagtaenganda sakay iti motorsiklona, ditoy metten a pinaltopaltogan dagiti dua a suspect a maatap a nangur uray kaniana.
Naamwan a cal.45 ken cal 9mm ti inusar dagiti dua a suspect.
Ulo,barukong ken likod iti tama iti biktima a rason iti nakatayan na.
Dagus met a naglibas dagiti suspect kalpasan iti krimen.
Kinuna iti pnp nga innala dagiti suspect iti wallet iti biktima ngem saan da met a ginaraw iti cal 9mm iti siket iti biktima a banag a pakaskasdaawan dagiti kameng iti pnp.
Ti biktima ket dati a chairman iti grupo ni Efren Rambo Rafanan iti ili a Santa Lucia.

SANTA LUCIA, Ilocos Sur.  BAbaen iti maysa a resolusion, nagbalin a maysan nga adopted son ti managing director ti PHilipp Morris Philippines ditoy Santa Lucia, Ilocos Sur.

Naisayangkat ti programa iti daytoy nga aldaw iti mismo gymnasium nga inatendaran mismo ni Nelson, ken da Congressman Eric Singson ken NTA Administrator Carlitos Encarnacion.

Kinuna ni Vice Mayor Estrella Hernaez a daytoy ket gapu iti kina-pilantropo ti Amerikano babaen kadagiti proyekto ken programa ti kompania a nakairaman ti ilida.

Maipalagip a saan laeng ditoy Santa Lucia ti nakaadaptaran ni Mr. Nelson no di ket uray kadagiti dadduma pay nga ili ditoy probinsia ti Ilocos Sur.

Ti Ilocos Sur ket maysa a tobacco producing province gapuna a daytoy ti maysa kadagiti narway a pangipanan ti proyekto ti kompania.

dannyboy

SANTA LUCIA, Ilocos Sur.  Gapu iti panangkaritda iti kapitan, nagpaputok daytoy iti paltogna tapno laeng agbuteng ti kabarangayanna idiay barangay Burgos, iti daytoy nga ili.

Ni kapitan Roland Bodaño ti mapapati a nagpalibang iti paltogna tapno iti kasta ket mangted iti warning kontra kenni Ronald Manzano, 39 anios, residente iti nasao met laeng a barangay.

Iti inisial nga imbestigasion dagiti panakabagi ti lineg, bayat a ti kapitan ken ti kabsatna ket nakalugan iti owner type jeep ket lumabasda koma iti sango iti balayda idi nakitada ti nasao a lalaki ket nagkuna iti kastoy: “hoy Allan gusing, fuck you…”

Gapu ta maripiripda a madi ti rikna ti lalaki, saanda a nagtagtagari ket nangliklikda iti dalan tapno maliklikan ni Ronald  Manzano.

Idi nakadanonda iti balayda, simmaruno ni Mr. Manzano a nakalugan iti motorsiklo iti asideg dagiti agkabsat a Bodaño sa daytoy ti nagpukkaw iti; “kumaritka ****, umaykadtoy gusing”, sa mapapati nga adda inala a paltog iti compartment ti luganna sa nagturong iti gate ti balayda.

gapu iti daytoy, nangisayangkat iti warning shot ni kapitan Bodaño a puon tapno pumanaw metten ni Mr. Manzano.

Iti imbestigasion dagiti pulisia, dagiti dua ket kandidato iti kinakapitan itay napalabas nga eleksion ngem nag-tieda, idi naisayangkat ti toss coin, nangabak ni Roland Bodaño ngem nangipila ni Ronald Manzano ti protesta a nangabakanna babaen iti desision ti korte.

Kabayatanna, iti pulisia, inparang ti kapitan ti firearm license cardna.

dannyantalan