Bin-i nga irik, libre a naiwaras kadagiti farmers iti ili ti Narvacan

Narvacan, Ilocos Sur-“Iti daytoy nga aldaw ket isu ti makunkuna a ‘certified seeds distribution program,’ ditoy ili mi a Narvacan.” Daytoy ti nabatad a kinuna ni Municipal Agriculturist Conrado Molina ti interview iti radyo DZTP kenkuana itattay bigat.

Naammuan kenni MR. Molina a tinawen nga ar-aramiden iti LGU ti narvacan, babaen ti liderato ni Mun. Mayor Edgardo Zaragoza ken daytoy metten ti maika-13 a tawen a programa.

KInuna ni Molina a maiwaras dagiti certified a bin-i nga irik a libre a maited kadagiti mannalon iti Narvacan.

Kinuna nga adda ti naggapu a subsidy iti national government ngem adda met sabali met a subsidy ti aggapu ti LGU a 50%, tapno ad-adda a matulungan dagiti farmers.

Naammuan a 10 a kilo ti tunggal mannalon tapno mawarasanda amin ken agdagup ti nasurok ti 4,000 ti mannalon iti daytoy nga ili.

Naammuan pay kenni Molina nga agdagup ti 1,200 a bags ti certified seeds ken ti pakaimulaanna a kalawa daytoy 1,200 nga ektarya.

Naammuan a ti pannakaiwaras ti nasao a bini-i ket babaen kadagiti municipal officials babaen ti panangidaulo ni Municipal mayor Edgar Zaragoza.

Jeff Barredo

Read Full Post »

Militar, pinaltoganna ti siyumanna, dedbol

Narvacan, Ilocos Sur- Natay ti maysa a baro a daytoy ket mapapati a pinaltogan ti stepfatherna a maysa a kameng ti Philippine Army, bayat ti kabarbaraan ti panaginumda ti arak, a napasamak sadiay brgy. Estancia, Narvacan, Ilocos Sur aggarup oras alas 9:15 ti rabii biernes.

TI biktima ket isu ni Arnel Bangloy y B riones, 23-anyos, baro ken residente iti brgy. Nalasin, Bangui, Ilocos Norte.

Idinto ti mapapati a suspek ket isu ni Cpl. Edwin Laguaton Sr. y Mabini, 43-anyos, naasawaan, step father ti biktima, kameng ti Philippine Army a naka-base iti 50 IB  iti brgyl. Sulvec, Narvacana, Ilocos Sur ken residente iti Brgy. Nalasin, Bangui, ILocos Norte.

Ti pakpakauna nga imbestigasyon kadagiti pannakabagi ti linteg, ti suspek ken biktima karaman metten kadagiti sumagmamano a kakadduada ket madama idi nga agiinumda ti arak iti pagtaengan ti maysa managan Carlo Cabang iti lugar a nakapasamakan ti insidente.

Naammuan a ti suspek ken biktima ket adda ti timmaud a saanda a nagkiinnawatan a nangitunda a ti suspek ket inasutna ti paltogna a saan a nailasinan nga isu ti inaramatna a panangpaltog ti biktima ti naminsan a daras bayat a nakatugar daytoy iti asidegna a nakapuntaan iti kannigid a paset iti bagi daytoy.

Ti biktima ket naitaray sadiay CISDH iti brgy. Paratang iti daytoy nga ili para ti pannakapaagasna ngem indeklara kadagiti mangngagas sadiay a natay ti biktima.

Idinto ti suspek ket bulontaryo met a simmuko daytoy iti 50 IB P.A. ngem naiturn-over daytoy iti police station iti daytoy nga ili para ti pannakakustudyana.

Naammuan nga idi aldaw ti domingo, aggarup oras ala una ti malem, ti ina ti biktima a ni Elizabeth Laguatan a daytoy met ti legal nga asawa ti suspek ket saannan nga ipursige pay ti kaso kontra ti naud-udi ken daytoy ti napalubusan ti panangkustudya kenkuana kadagiti kameng ti polisya babaen met ti panangawat iti opisyalna a ni MSGT. Gilbert Peria.

Jeff Barredo

Read Full Post »

Motorsiklo ken bisekleta, nagsinnapgid, maysa ti kritikal

Narvacan, Ilocos Sur-Nakaro a nasugatan ti nagmaneho ti maysa a motorsiklo a daytoy ket aksidente a nasapgidna ti sinarunona a bisekleta a napasamak iti national highway a masaksakupan iti brgy. Bantay Abot, Narvacana, Ilocos Sur aggarup oras alas siete ti sardam ti domingo.

Nabigbig a ti nagmaneho ti maysa a Honda TMX 155 MC, addaan plaka ZF-1578 ket isuni ROlando Versola y Arenas, 49-anyos, naasawaan, addaan drivers license ken residente iti brgy. Quinarayan, Narvacan, Ilocos Sur.

Idinto ti nakasinnapgidna ket maysa a nakabisekleta, nabigbig ti nagan Lester Macque y Concordia, 21-anyos, baro ken residente iti lugar a nakapasamakan ti aksidente.

TI imbestigasyon kadagiti kameng ti polisya iti daytoy nga ili, dagiti dua a lugan ket agdaldalyasatda idi iti national highway nga agturturongda iti daya a direction.

Naammuan a ti bisekleta ket immun-una idi dayta a gundaway.

Ti motorsiklo nga adda idi iti likudan ti bisekleta ket mapapati nga inovertekanna a ditoy nga aksidente a nasapgidna ti bisekleta.

Nagresulta a ti motorsiklo ken bisekleta ket nauyasda iti tengnga ti kalsada.

Naammuan a ti nagmaneho ti motorsiklo ket grabe a nasugatan iti ulo ken nagsagaba pay ti pannakasugsugat iti nadumaduma a paset iti bagina, a daytoy ti sigida a naitaray sadiay CISDH para ti pannakapaagasna.

Idinto ti nakabisekleta, naaddaan met ti saan unay a nakaro a pannakasugat.

Jeff Barredo

Read Full Post »

Lakay, napaltogan, mismo iti uneg ti balayna

Narvacan, Ilocos Sur- Nagsagaba ti pannakapaltog iti makannigid a sakana ti maysa a lakay bayat a daytoy ket agbuybuya idi iti programa iti telebisyon iti uneg ti pagtaenganna sadiay Sitio Barbarit, San Pedro, Narvacan, Ilocos Sur idi aggarup oras alas siete idi sardam ti martes.

Ti biktima ket managan Adorio Callejo y Aquino, 51-anyos, naasawaan, mannalaon idinto ti mapapati a suspek ket managan Bonifacio Aquino y Sotelo, 33-anyos, naasawaan, mannalon agpada dagitoy a residenteda iti nakapasamakan ti nasao nga insidente.

Ti imbestigasyon kadagiti pannakabagi ti linteg, ti biktima ket agbuybuya idi iti programa iti telebisyon iti uneg a mismo iti balayna, ket idi dayta a gundaway, naammuan a ti suspek ket simrek ken pinaltoganna ti naminsan a daras ti biktima a nakatugaw a nakasango daytoy iti tv.

Magsagaba ti tama ti bala ti paltog iti kannigid a saka ti biktima a daytoy ti naitaray sadiay Central Ilocos Sur District Hospital para ti pannakapaagasna, idinto ti suspek, ket sigida a naglibas kalasan ti insidente ngem bulontaryo daytoy a simmuko iti kuerpo ti polisya iti daytoy nga ili.

Ti paltog a naaramat ket mapapati a kalibre 22 ngem daytoy ket mapukpukaw.

Ti motibo, sigud a susik.

Agdama pay laeng a maisaysayangkat ti imbestigasyon ti nasao a pasamak.

Jeff Barredo

Read Full Post »