San Esteban, Ilocos Sur- Boluntaryo a simmuko iti kuerpo ti polisya iti ili ti Santa Maria, Ilocos Sur ti Driver ti maysa a Trailer Truck a daytoy ti nakapaatan ti kasemsemento a kalsada sadiay ili ti San Esteban, Ilocos Sur idi aggarup oras alas 3:00 ti malem ti mierkoles bayat nga agdaldalyasat daytoy iti pasetna a ‘one lane’ gapu ti pannakasemsmentona ti national highway.
Nabigbig a ti driver ket isuni Casamiro Molina y Pipo Jr., 39-anyos, baro, addaan ti drivers license ken residente iti Brgy. Mira, Bantay, Ilocos Sur nga isuna ti nangmaneho ti Trailer truck, nga addaan plaka 325.
Ti imbestigasyon, ti nasao a truck ket agdaldalyasat iti national highway iti pasetna ti ‘one lane’ nga agturturong iti amianan a direction.
Inta madanunna iti pasetna ti kurbaan nga isu met iti batog iti masemsemento a paset ti kalsada, nakasabat iti maysa a tricycle nga agdaldalyasat iti laud a paset ti highway iti bahada daytoy.
Liniklikan ti trailer truck, ket isu ti gapu a naatalanna ti kasemsemento a kalsada nga adda ti uppat nga span ti nadadael nga aggatad ti 110,730.90 pisos.
Ti naisayangkat a kumprontasyon iti police station iti RKT marketing nga akinkukua ti trailer truck ken iti kontraktor ti kalsada, immanamong ti RKT marketing a bayadanda ti nadadael ti truckda.
Jeff Barredo