Valentines Drama: Mrs Inuyas ni Mr

SANTA CRUZ, Ilocos Sur. Saan a nagbalin a naragsak ti Valentines Day ti agkasimpungalan idi inuyas ni mister ni baketna iti semento a kalsada idi Pebrero 14, idiay barangay Dili, itoy nga ili.

Ti biktima ket managan Marilou Javillonar, 24 anios, residente iti nadakamat a barangay kabayatanna a ti suspek ket managan Joey Valdez, 26 anios, live-in partner ti biktima, residente met iti Balaoan, La Union.

Iti inisial nga imbestigasion, ti suspek ket madama a makiin-inom idi inayaban ti biktima tapno manganen, ngem ditan a nakaunget daytoy a nagtungpal iti ririda.

Gapu iti suronna, linuganan ti suspek ti motorsiklo ngem iniggaman ti biktima ti imana, ngem iti dayta a gundaway, iniggaman met ti suspek ti imana ti biktima sana pinataray ti motorsiklo iti agarup 120 a metros iti sementado a kalsada.

Gapu iti dayta, nasugatan ti biktima kabayatanna a mapapati a naglibas ti suspek kalpasan ti insidente.

Read Full Post »

Love Triangle… SK Chairman Nabagsol

SANTIAGO, Ilocos Sur. Maysa a Sangguniang Kabataan bhairman ti nabagsol gapu iti love triangle a nakairamanan ti kabsatna idiay barangay Busel-busel itoy nga ili.

Ti biktima ket managan Walter Galano, 18 anios, baro, residente iti Baybayabas, Santiago, Ilocos Sur kabayatanna a ti mapapati a suspek ket managan Darwin Sabado, 19 anios, residente met iti Bulbulala itoy nga ili.

Iti inisial nga imbestigasion ti pulisia, ti kabsat ti biktima a managan Raymart ken ti suspek ket nagririda maipanggep iti balasang a girlfriend da.

Iti panagririda, ket naganawa ti biktima ngem iti dayta a gundaway ket inuksot ti suspek ti kutsilio ket ditan a binagsolnan ti biktima iti paset iti barukongna.

Naitaray iti Candon City Hospital ti biktima kabayatanna a ti suspek ket naglibas iti dayta a gundaway.

Agtultuloy ti imbestigasion dagiti panakabagi ti linteg.

Read Full Post »

Natadem A Tadem… Bagsol!

CANDON CITY. Gapu iti natadem a kita, nagkinursunada ti dua a lalaki a nagtungpal iti panakabagsol ti maysa idiay barangay Oaig Daya, itoy nga ili.

Ti biktima ket managan Edilberto Gacutan, Jr. 26 anios, naasawaan, residente iti San Nicolas, Candon City, kabayatanna a ti suspek ket managan Allan Galay, 26 anios, baro, residente met iti Bagani Campo itoy met laeng a siudad.

Iti inisial nga imbestigasion, ti biktima ket nakatakder iti sanguanan ti 24 Hours Videoke a makipatpatang iti maysa a babai idi simmangpet dagiti suspek ken kadduana ket inasitganda ti babai.

Iti dayta a gundaway, mapapati a nagkinusilap dagiti dua ket nangala ti biktima ti kawayan ket inpang-orna iti suspeka nakaalaan ti timidna. Iti dayta a gundaway bimmales ti suspek ket binagsol ti biktima sa nagtaray a boluntario a simmuko iti pulisia.

Naitaray ti biktima iti ospital kasta met ti suspek.

Agtultuloy ti imbestigasion dagiti panakabagi ti linteg.

Read Full Post »

ISDA Project, Agtultuloy

Umabot iti 110,000 a piraso ti tilapia fingerlings ti imbulos ni Gobernador |Deogracias Victor “DV” Savellano ken ti agriculture office ti probinsia iti lima nga ili iti maikadua a distrito ti probinsia idi Pebrero 17.

Daytoyen ti maikatlo a panagiwaras ti gobierno probinsial iti lames kadagiti kadandanuman babaen ti programa nga Ilocos Sur Development of Aquamarine wenno ISDA Project nga addaan iti panggep a mangpaadu iti lames kadagiti bagi ti danum ken masuposupan ti panangkurang ti suplay a lames ditoy probinsia.

Karaman kadagiti ili a nakaibulosan dagiti lames ti Santiago, Sta. Maria, Burgos, Narvacan ken Santa.

Agtuloy ti ISDA project agingga a maikkan amin nga ili iti Ilocos Sur.

Kinuna ti gobernador a kalpasan ti tallo a bulan, dadakkelton dagiti naibulos ket umadunto metten ti nagyan dagiti bagi ti danum  no la ketdi mataraken dagitoy a nasayaat. (Mancielito S. Tacadena/NBN Vigan)

Read Full Post »