BANAYOYO, Ilocos Sur. Maysa a dakkel a proyekto a panakalukat ti maysa a kalsada ti nainaguraran kabayatan iti panag-fiesta ken panagkasangay ni Mayor Severino Galanga itoy nga ili.
Daytoy ket babaen iti panakalukat iti Junction provincial highway ti Lintic road, pakairamanan ditoy ti rangtay a makatulong iti barbarangay a kameng ti Agrarian Reform Community ti ili.
Malaksid kadagiti opisial ti ili, pakairamanan kadagiti nakipartisipar iti panakalukat ti proyekto ket dagiti opisial ti Department of Agrarian Reform ken ti Department of Public Works and Highways.
Iti panagsarita ni Mayor Galanga, dinakamat a ti proyekto ket dakkel a tulong kadagiti bumarangay nangruna iti ARC barangay a pakairamanan ti Pila, Lintic, Montero ken Banbanaal.
Malaksid iti panakalukat ken panakasemento iti kalsada iti kalsada ket ti panakabangon iti rangtay, panakaipaay iti post harvest facilities, shallow tube wells ken dadduma pay.
“Ti kalsada ken rangtay ket mangkonektarton tapno naas-asideg ken nalaklaka ti panakaibiahe kadagiti produkto ditoy Banayoyo agingga Candon.” Kinuna ni Mayor Galanga.
Manamnama a maleppas ti phase 1 iti Hunio iti daytoy a tawen.
Nupay ti pondo ket naggapu iti Department of Agrarian Reform ngem adda ti counterpart ti municipal government a daytoy ket inpaay met ni Congressman Eric Singson tapno maipatungpal ti nasao a proyekto.
Leave a comment